En ur strollad anvet « POT Breizh », e kaver kevredigezhioù bodet evit labourat war plas yezhoù ha sevenadur Breizh e-doug ar Prantadoù Obererezhioù Tro-skol (POT).

Tro-dro d’an tem-resis-mañ e vo aozet  gant ar strollad-labour-se un devezh eskemmoù hag emgavioù, a-benn ar Gwener 3 a viz Ebrel, e kreizenn sevenadurel Amzer Nevez e Plañvour (56), evit klask gwelout penaos emañ ar jeu e Breizh : petra e vez kinniget da vat a-fet sevenadur Breizh, penaos gwiriekaat ar c’hinnigoù, peseurt frammoù ha peseurt stummadur a c’hortozer ?
Pedet eo neuze an holl berzhidi da zont da reiñ o zesteni, da eskemm, ha da sevel o goulennoù, forzh pe hini a vefe o c’harg e-barzh mont e-dro ar prantadoù obererezhioù tro-skol.
Kavout a rit amañ dindan programm an devezh hag an teul enskrivadur.

Posupl eo deoc’h ivez pellgargañ an doare PDF amañ.
[bloc-gris]

Roll an devezh

– 9eur1/2 degemer ar berzhidi

– 10e00 -10e1/kinnig an devezh, digoradur diwar-benn POT ha yezhoù ha sevenadur Breizh gant Charles Quimbert (Rener ar BCD)
Abegoù an devezh: aesaat plas sevenadur Breizh er POT.
Danvezioù a blijfe deomp e vefe kaozeet outo  :
Kudennoù pleustrek e-liamm gant an doare merañ ar POT, gwellaat ar stummadurioù, kizidikaat ar strollegezhioù, kinnig disoc’hoù, ha kement ‘zo.

– 10e1/2 – 11e00 Kinnig dre vras ar POT e-barzh framm adkempenn an amzer skol gant Françoise Favreau (Renerez akademiezh servijoù an Deskadurezh stad, ensellerez an akademiezh)
Bilañs ar POT dre vras (palioù, diaesterioù, pezh en deu graet berzh…)

– 11h00 – 11h30 Petra eo sevenadur Breizh ? gant Yves Defrance (etno-muzikologour, kelenner e skol-veur Roazhon 2 )

11e1/2 – kreisteiz Kinnig dre skeudennoù : kelaouadenn filmet (5’)
POT ha sevenadur Breizh : Titouroù sifret diwar-benn an obererezhioù (sifroù bet kaset gant ar c’hevredigezhioù sevenadurel). Sifroù sontadeg BCD/Sevenadurioù.
Eskemmoù ha diviz.

– Kreisteiz – Kreisteiz hanter Kinnig taolioù-arnod damheñvel tro-dro da yezh ha sevenadur Okitania gant Marie-Hélène Villacampa CFPOc (Kreizenn stummadur micherel en Okitaneg)
 
– 12h30 – 14h00 lein

– 14h00 -15h30 : stalioù-labour

* Stal 1 : POT ha sevenadur Breizh. Peseurt palioù ? Peseurt diaesterioù da-geñver o staliadur ?
Kenaozet ha kaset en-dro gant Philippe Ramel (kelc’h keltiek Roazhon)
Perzhidi: Robert Raulo (eil-prezidant Kendalc’h), Philippe Janvier (Skol sonerezh An Oriant), Gwenola Ropars-Sohier (Ensellerez war ar Brezhoneg e Penn-ar Bed), Jean-Paul Chevrel (FCPE hag ezel Kuzul akademiezh ar yezhoù rannvro)

* Stal 2 : Ar stummadur / rummadur /michereladur ar berzhidi.
Kenaozet ha kaset en-dro gant  Lena Gourmelen
Perzhidi: Laurent Muguet (USEP-Kevre an deskadurezh 56) ; Serge Kerichard (CEMEA) ; Bérénice de Beauvoir (ADPEP 56) ; Isabelle Kauffmann (DRJSCS) ; Corinne Gouadec (CNFPT).

* Stalig 3 :Pezh emañ ar strollegezhioù en-gortoz a-fet sevenadur Breizh (kinnigoù, liested, kenglotausted).
Kenaozet ha kaset en-dro gant  Alain Madoré (kenbrezidant  Kuzul Diorren  Bro Redon Kreisteiz Breizh)
Perzhidi: Sébastien Miossec (Maer Rieg, Prezidant  ar C’hocopak), Armelle Bothorel (Maerez Lanvealgon, eil-prezidantez tolpad St-Brieg), Emmanuelle Williamson (eil-maerez An Oriant, krget eus ar sevenadur), Etienne Bars (DDCS29), Soazig Prian (FCPE)

– 15h30 -16h00 : kinnig ar sintezennoù

– 16h00 – 16h30 : eskemmoù kaset en-dro gant un hanterour
Hanterourien : Charles Quimbert + Philippe Lanoë

– 16h30 – 17h00 : Klozadur gant Jean-Michel Le Boulanger (eil prezidant ar C’huzul rannvro, karget eus ar sevenadur)
[/bloc-gris]

Emañ an abadenn radio “Sevenadurioù” diwezhañ enlinenn. Talbenn ar miz-mañ : ar c’hontadennoù e Breizh. Un drugarez evit kaozeal deus “Il était une fois… en Bretagne, Contes, collectes & conteurs” un diskouezadeg niverel bet lakaet enlinenn gant BCD/Sevenadurioù. Gouestlet eo an abadenn-mañ da Albert Poulain, konter meur eus Piperia aet d’an aon d’ar 6 a viz Here.

[Mont war bajenn an abadennn]

Ar 46^vet Tavarn Istor a vo dalc’het d’an 23 a viz here o tont adalek 6e30 noz e sal ar gouelioù Pleyber-Christ  (29).

Aozet e vo gant kevredigezh “Tavarnioù Istor e Breizh” gant sikour Ti-kêr Pleyber-Christ, Pleyber-Patrimoine, ha mediaoueg Pleyber-Christ.

Fellout a rae da T/di-kêr Pleyber-Christ aozañ an nozvez-se evit kontañ ha dec’hel ur roud deus istor ar stalioù Guevel-Rio a-raok ma vefe distrujet ar savadurioù.

Kaset e vo an abadenn gant Gérard Alle, skrivanger.

Labourat a ra Bretagne culture diversité da skignañ danvez sevenadurel Breizh. Sevel a ra ostilhoù aes da implij evit tizhout ar muiañ a dud posubl, ar re yaouank da gentañ. Labourat a ra ar gevredigezh gant aktourien sevenadurel evit sevel raktresoù a-gevret. Skignet e vez an danvez sevenadurel-mañ dre ar stummoù niverel ha dre Internet dreist holl.

Diskouezadegoù enlinenn

Ur bern diskouezadegoù a vez kinniget, met e-pad ur mare resis hepken, n’int ker peurbadus siwazh. Mont a ra BCD/Sevenadurioù Breizh e darempred gant ar re a sav anezho evit kinnig niverelaat o labour evit skignanñ anezhañ war Internet, da reiñ un eil buhez dezho.

Ar c’hontadennoù e Breizh, kentañ raktres enlinenn

An diskouezhadeg kentañ bet lakaet dre ar stumm niverel a zo gouestlet d’ar c’hontadennoù. « Ur wech e oa… e Breizh, kontadennoù dastum ha konterien » a zo ur raktres savet gant Maner Kernault e Mellac e 2004. An testennoù a zo bet skrivet gant Fañch Postic, ijiner er CNRS, e-penn ar k/Greizenn Enklask Breizh ha keltiek (Skol-Veur, Brest).

Evi sellet ouzh an diskouezadeg : http://www.bcd.bzh/expo-conte.

Labourat a ra BCD/Sevenadurioù Breizh bremañ da lakaat an diskouezadeg war ar glad sevenadurel dizanvez, savet gant Kenstroll ar GSD e Breizh war Internet.

Ar brezel 14 bevet gant ar Vretoned, pe e vefent bet war an talbenn pe chomet e Breizh.

Ugent tem (an trañcheoù, ar brizonidi, al labour, ar skol…), skeudennaouet gant un toullad dielloù a bep seurt, e brezhoneg an darn vrasañ anezho : fotoioù, lizhiri, pennadoù kazetennoù… Ur c’heriaoueg hag un dastumad danevelloù e fin al levr. Ul lec’hiennad dielloù (dielloù al levr, filmoù, enrolladennoù…) a ya da heul al levr.

Evit treuzkas ur yezh hag ur sevenadur er bed a-vremañ e vez aozet kentelioù pe stajoù, ha gwir eo ez eo ret hen ober ; met gall a reer ivez daremprediñ tud zo o deus desket o yezh hag o sevenadur a-vihanik. Lakaat an dud da gejañ outo eo pezh a glask BCD ober gant ar raktres Bazhvalan (e brezhoneg) pe Baçadou (e gallaoueg).

Gwelloc’h deskiñ marvailhat e-pad ur veilhadeg, gwelloc’h deskiñ gouiziegezh al louzaouennoù o pourmen er maezioù eget hen ober e-pad kentelioù e salioù bras ur skol-veur !
Pinvidik-mor eo kejañ ouzh ur brezhoneger pe ur gallaoueger a-vihanik. Dre ar yezh e vez klevet danevelloùigoù hag e vez desket ur sevenadur hag un istor ne c’hellfemp ken anavezout nemet o lenn levrioù, e mod all. Perc’hennañ ur c’houiziegezh, un doare da welet ar bed a vez graet, ha memes amzer e vez klevet muzik ar yezh, troiennoù ur vro pe un den.
N’eo ket ken aes ha se, evit danvez brezhonegerien pe gallaouegerien a zo o chom e kêr, alies, da zaremprediñ tud a oar ar yezh a-vihanik, hag int kozh hag o chom war ar maez evit ar muiañ anezho. Diaes ar c’hejadennoù : disheñvel-mat eo ar bedoù lec’h m’emaint o vevañ, pep hini anezho e zoareoù da ober, ha se zo kaoz n’eo ket aes en em gompren. Evit terriñ an dizemglevioù ha lakaat ar bedoù-se da dostaat eo aet BCD war glask tud a vefe kad da vezañ Bazhvalan pe Baçadou, da lavaret eo da c’hoari an hanterour.
BCD/Sevenadurioù Breizh en deus karget Lena Catalan-Marcos da vont war glask an treizherien-se, gant sikour tud ha kevredigezhioù e pep korn eus Breizh-Izel : Tiez ar Vro, kevredigezhioù sevenadurel… Ouzhpenn kant den he deus kavet, an holl anezho kontant da ambroug unan o teskiñ da di ur brezhoneger pe ur vrezhonegerez a-vihanik anavezet dezhañ, pe dezhi.

[bloc-gris]

Embann a ra BCD/Sevenadurioù disoc’hoù an enklaskoù-se war ur gartenn enlinenn, a vo adnevezet alies. War ar gartenn-se e vo kavet chomlec’hioù an dud o deus lakaet o anv evit bezañ «Bazhvalan» pe «Baçadou» : http://bcd.bzh/bazhvalan/.

[/bloc-gris]

«A bientôt de vos nouvelles» (ken voc’h lennet): setu titl un teulfilm web diwar-benn ar Brezel Bed Kentañ bet kaset da benn gant kevredigezh Bretagne Culture Diversité / Sevenadurioù Breizh diwar lizhiri eizh soudard breton,a bep seurt istor-buhez ganto.Sikouret eo bet ar raktres-mañ gant Rannvro Breizh.

Ur rouedad kemmesk a drañcheoù, kantadoù a gilometradoù anezho etre ar menezioù Vosges ha mor an Hanternoz, pa vez anv eus talbenn ar c’hornog nemetken ; daou viz emgannoù hag hanter-kant, war zouar ha war vor, met en aer ivez ; milionoù a dud lazhet ha muioc’h a brizonidi, a dud gloazet, a gorfoù hag a eneoù mac’hagnet, ha mac’hagnet-euzhus a-wechoù, n’eus nemet soñjal er gevredigezh tud difetet brudet, siwazh, a oa bet anvet «Gueules cassés» gant o diazezourien – en o zouez e veze kavet Albert Jugon, ur Breton eus Montreuil-sur-Ille… Un dae eo ar Brezel Bed Kentañ evit spered an den, enta, ken ledan, ken kemplezh hag eo bet.

Ha padal, e-touez kement a draoù spouronus, ma fell deomp kompren da vat peseurt euzh an hini a oa bet bevet neuze, penaos en doa dislammet ar feulster e kreizig-kreiz ar bloavezhioù 1910, o klozañ trumm ur mare a vez graet «Belle époque» eus outañ alies, emichañs ez eo o vont tal-kichen an dud vunut e c’hellimp en ober. Hag e-touez an holl mammennoù a c’hall an istorour implij, sur a-walac’h ez eo skridoù ar soudarded ar re a ziskouez ar gwellañ petra eo bet ar Brezel Bed Kentañ a-benn ar fin.

Setu pezh a ginnig hor teulfilm web deoc’h : mont da heul eizh soudard breton o lenn al lizhiri bet skrivet ganto, kuzhet en un trañche el linenn dan pe en ur c’hantonamant-diskuizh sioul pe siouloc’h. Anvet e oant Jules, Henri, Louis, Jean, Frédéric pe Auguste. War ar vicher mestr-skol, ofiser a-vicher, peizant pe memes person e oant. Eus Breizh-Uhel ha eus Breizh-Izel e oant hag emaint o vont da lakaat ac’hanomp da zizoleiñ ar Brezel Bras.

Koulskoude, daoust ma ‘z int tud disheñvel-mat, ne c’hello ket an eizh test-mañ diskouez deoc’h pep tamm eus ar brezel luzius-se. Soudarded war droad ma oant holl, n’eo ket bet bevet ar memes brezel ganto ha gant an artilherien, hag ar vartoloded, ar brizonidi, ar re bac’het pe ar re chomet er gêr kennebeut. En o lizhiri e lenner petra oa ar brezel bevet er vouilhenn, e foñs an trañcheoù. Ha dre an dra-se ez eo kreñvoc’h o testenioù c’hoazh.

Perak labourat gant lizhiri-brezel ?

E 1881 e oa deuet ar skol da vezañ digoust ha rediet, ha setu e oa aet war wellaat live skol an dud a-galz. A-hed ar Brezel Bed kentañ e kenskrivas ar soudarded gant o familh hag o mignoned. Ouzhpenn dek miliard lizher a zo bet eskemmet etre tout. Ur vammenn dibar eo an testennoù-se evit an neb a fell dezhañ pe dezhi dizoleiñ buhez pemdez ar soudarded. Anavezout anezho, gwelet ar brezel dre o sell personel, don, setu ar pezh a c’heller ober o lenn o lizhiri.

Perak sevel un teulfilm web ?

Peogwir en un teulfilm web e c’hall an hini a zo o sellet dibab h/e-unan e peseurt urzh e vo kontet an istor dezhañ pe dezhi. Etreoberiañ a vez kinniget dezhañ/i neuze, pezh ne vez ket graet en un teulfilm mod-kozh.Pa fello dezhañ/i e c’hello dibab ur chabistr kentoc’h evit egile, mont war-raok pe war-gil, mont donoc’h en un tem, sellet ouzh ar bonus liammet gant ar chabistr emañ o sellet outañ, lenn al lizhiri en o fezh pe tammoù anezho…

Piv eo ar soudarded ?

Implijet eo bet lizhiri eizh soudard ganemp :

• Auguste AMICEL, bet ganet d’an 11 a viz Genver 1879 e Matignon. Beleg e oa, ha kaset e oa bet da 10vet kevrenn klañvdiourienan arme.
• Henri BOUYER, bet ganet d’an 22 a viz Du 1883 e Paimboeuf. Mestr-skol e oa pa oa galvet da vezañ serjant en 265vet rejimant troaderien da gentañ, hag en 264vet war-lerc’h.
• Loeiz HERRIEU (Louis Henrio hervez e anv ofisiel). D’ar 26 a viz Genver 1879 e oa bet ganet e Kaodan. Kemer a rae perzh en emsav ar varzhed, evit Breizh hag evit ar brezhoneg. Kaset e oa d’an 88vet rejimant troaderien, lec’h ma oa kaporal-fourrier e gompagnunezh. E brezhoneg en doa skrivet e lizhiri.
• Jules LACHIVER, bet ganet d’ar 24 a viz Kerzu 1891 e Goméné. Mestr-skol e oa, ha kaset da serjant e 70vet rejimant troaderien Gwitreg.
• Frédéric PERQUIS, bet ganet d’ar 6 a viz Genver 1896 e Dinan. A-boan e oa bet tapet e vachelouriezh gantañ pa oa bet kaset da soudard eil renkad e 25vet rejimant troaderien Cherbourg.
• Jean PERRUSSEL, bet ganet d’ar 1añ a viz Genver 1875 e La Bouëxière. Ostiz ul leti e oa pa oa bet galvet da 76vet rejimant troaderien an tiriad.
• Désiré ROGER, bet ganet d’ar 14 a viz Genver 1891 e Saint-Séglin. Dont a reas eus ur familh peizanted milinerien ha kaset e oa da 70vet rejimant troaderien Gwitreg.
• Louis ROGER, breur bihan Désiré, a oa bet ganet d’an 19 a viz Du 1893 e Bruc-sur-Aff. Kaset e oa ivez da 70vet rejimant troaderien Gwitreg.

Pedet eo ar genrouedaderien da vont da heul ar baotred-se war ar pemdez, paotred disheñvel-tre an eil hag egile daoust ma oant holl o vevañ e Breizh.

Un ostilh pedagogel evit ar gelennerien

Gall a ra pep hini sellet ouzh hor teulfilm web, ha neuze bezañ soubet da vat en istor ar Brezel Bed Kentañ. Un ostilh pedagogel dibar a c’hell bezañ, neuze. Echuiñ a ra pep chabistr gant ur rann skeudennaouet gant kartoù ha skeudennoù-diell bet livet a lak ar c’hennaroud da vezañ aes da gompren ha da dreuzkas.

Penaos e vez kinniget ?

6 chabistr, urzhiet dre amzerioù ha temoù, a za d’ober an teulfilm web-mañ.

1. Mont d’ar brezel ha dizoleiñ an tan modern

2. Brezel an trañcheoù

3. Brezel ar greanterezh hag emgannoù o padout

4. Nerzh-spered ar stourmerien

5. 1918… a-benn ar fin

6. Dizoudardañ ha kaout soñj

E Breizh-Uhel e vez komzet ur galleg distumet a zo tost deus un trefoufouedaj… Ma laosker o tivskouarn da straniñ e klever ar pezh a vez anvet c’hoazh gant lod un trefouedaj, ar pezh a zo e gwirionez ur yezh, anvet ar gallaoueg…

E11-S02-Le Gallo from BCD Sevenadurioù on Vimeo.

Un arload evit dizoloiñ Breizh eo “Breizh App”. Kinniget e galleg hepken e penn kentañ, tu ‘zo bremañ lenn an dañvez e brezhoneg.

Dizoloit Breizh dre doserioù dre demoù, dre ur gartenn etreoberiant pe dre ur rizenn amzer !

[bloc-noir] Kinniget evit Android : https://play.google.com/store/apps/details?id=com.bcd.breizhapp

Hag evit iOS : https://itunes.apple.com/app/id914794602

[/bloc-noir]