De pere berton e de mere berichone, Alain Goutal s'alete en Bertègn en 1972. Aotou és mile-afutiaos, sen inventerie il l'empllaye pour les ribans dessinës, le dessin de gazetterie, meins etout pour la banie qi montere den qhi q'i s'engaije, pour la qhulture bertone ou le respect de l'entour, premier.
Li q'a colevë Quai des Bulles, la federâille de ribans dessinës de Saint-Mâlo, il a du pllézi a envalourer e a mettr pus fôt de monde a qenétr l'art populére-la qe sont les ribans dessinës. I tarvâille en etrârie su eune couée de gazette come Pilote, Frilouz, Je lis des histoires vraies, Nitassinan, Le Canard de Nantes à Brest, Oxygène, Cinémaction, Greenpeace, Bretagne Actuelle, Bretagne Magazine...
Ses banies monterent comben q'il eme le dessin de gazetterie, la gouaberie, la satire e la grimace, de cai qe je vayons o les omes politiqes emmorfôzës en bétes. Souventes fais, ses orinézons sont fétes de hipe-e-de-hape meins i monterent eune nouvézon tout come : ded'o li, la banie su papier kraft pâssit de mode a caoze q'il avaet afére, permier, de terouer eune amarée tecniqe pour fére eune banie su papier leron.
