13 du maez de novembr 1909, ferme de Bruté. Traez jieunes prinzoniérs abroqite l'enijon Gauthier raport qe la revoûsserie qi tournit en beure de chieuvr l'etë d'avant ét li q'i n-n'ét l'aoteur. Sti-la n-n ara du coutè den la piao a la parfin. Dede la, vla les abroqous a s'ensaover vitement. Aprés qe d'avair robë eune tourte de bran e des hanes pour qe le monde ne les erqeneûsseraent pouint (les afutiaos bllancs des enijons taent ben de la qenûe a Belle-Ile), les traez garcs-la terouite a se nijer den la cave d'eune ferme. Eune semaine de temp durant, i vont y’étr la a manjer des baites robées de netée den les cllôz pa'la. A la parfin, i fute serrës yun aprés l'aotr, yun de yeûs avaet les piës gerouës. Un coupl de maez aprés, devant le tribuna derçant de Lorient, les enijons-la contite le martiraije q'il avaent a endurer : "En nous daobe o un pibier !" Permier, il enqhuzite le sien q'il avaent abroqë, l'enijon Gauthier, "un métr-garc", un "tapou" signorizë "Le lutou", de prendr afére és aotrs de vûe de jou come de vûe de net, de les tocer, de jeouer ao gardou e d'étr un qhettaod par dessu le brécot. L'afére-la montere ben comben qe la taet nijant entr les jieunes prinzoniérs e comben q'i taent tapous entr yeûs. Les enqhuzës fute condaonës, a la permiere jujerie, a 18, 15 e 1 maez de castéouane, e a la deûzieme, a 4 anées de prinzon. En pus d'ela, lous ensaovement o un coutè les menite, de ça, a fére lous conjë en Afriqe du Haot, den les bagnes de l'Armée.
Pus fôt qe les devarinades a la torche mai l'deu-la, les ensaovements d'enijons de Belle-Ile ont d'étr vûes come un depllet. S'ensaover, la q'ét monter su la roche pour conter des martiraijes. La Statistique pénitentiaire montere ben q'entr 1880 e 1911, i fute 401 colons de Belle-Ile a ghetter a s'ensaover. Ren qe 84 de yeûs russite a s'ensaover de lous gardous e, a la parfin, i n-n a zû q'eune fâillie petite bande a rencontrer lous afére e a pouair aler diq'ao continent.
A-vûe yelles des aotrs colomnies punissementieres, les aqenûes de Belle-Ile monterent ben l'estatut ben a son apart du tenement morbihanaez-la. Invencion de s'ensaover dede la !
