Entr le bout du XIXe siecl e l'entamâ du XXe, la taet ben râle les assembllées de vilaije sans clliqe a soner. Partout den le payiz, les tropelées de muziqe taent periées a veni soner les dimaines de la prime e pour les assembllées de l'etë. La fezanderie punissementiere, q'avaet ao runje de moralizer le monde su le bon de sen ouvraije, abutit qe châqe ôtë de derçaije publlic araet zû sa clliqe. De méme, les enijons qi sonaent, eune fai debârës, seront en biao, cant q'i pâsseraent soldards, de terouer eune pllace den les clliqes de l'Armée. A Belle-Ile, n-i ara eune "clliqe" dés aossitôt l'entamâ de la colomnie. O retiraet ben den les aotrs clliqes mirlitére de méme (tambours, qhuivrs) e, a l'entamâ du XXe o pâssit "harmonie" (acordance) cant qe des cllarinettes e eune conterbasse s'erivite. Un contermétr sonou fut minz a mener la.
A lére les gazettes de Belle-Ile du temp-la, nen s'avize ben comben qe la clliqe de la colomnie punissementiere de Belle-Ile taet eune abegaoderie. Maogrë q'ét bétôt den tous les articls qi taent a dire su la colomnie (ensaovement, revoûsseries, haltabou o les siens de Belle-Ile...) yeûs qi contaent des soneries de la clliqe taent, a la contrére, nette alôzants. Durant l'etë 1895, les enijons sonous taent a Porzh-Noalou (56). Lous sonerie, L'Avenir du Morbihan nen fut ebaobi : "J'ons de conter de la muziqe des petits enijons de la Colomnie de Belle-Ile qi minz de la haitance en pus a la journée-la seben. Le menou de l'aletement iléz-la q'ét ben familier a zû eune bone inspirézon du coup-la come a châqe fai, en nous perpôzant eune surprinze de méme. Toutes nôs alôzeries és petits artists-la". Un coupl d'anées aprés, la clliqe eternit les courseries velocipediqes de Vane come si q'ole araet të la principale : "a deûz oures la veprée, a soner un pâs redoubllë a aler d'un biao bât, la muziqe de la colomnie punissementiere de Belle-Ile s'ét erivée ao velodrome o eune cohue de monde a la sieudr, o s'aletit dede la den le cllôz perchain de la tribune des jujous." C'ét de méme qe la sonerie met le monde a ombllier les tocées e qe les ergardous tout enhaitës q'i sont crayent ben vaer den la clliqe-la eune afére ben rencontrée, yelle d'un projit de derçaije qi emmorfôzeraet des jieunes non-valants en métrs-sonous de muziqes a bufer deden. Cant q'i s'enretournaent a Haote-Boulogne, les enijons treûvent pâs-meins les dortouérs en clis, la lâssure e les martiraijes d'ertour.
