Diskouezet o deus splann klaskerien hon amzer vremañ penaos ez eus ur gumuniezh yezh etre ar galianeg hag ar yezhoù predenek. Ar galianeg ne oa ket aet da get penn-da-benn c’hoazh d’ar c’houlz ma oa deuet an Arvorig da vezañ Breizh, e Kornôg ar vro dreist-holl, ur c’horn distro anezhañ, e-keit ma oa ar Reter war romanekaat. Ar gumuniezh yezh-se etre ar galianeg – ur yezh eus an Henamzer a chom dilerc’hioù anezhi e brezhoneg hep mar ebet – hag ar brezhoneg end-eeun, ur yezh predenek deuet eus Enez-Vreizh, a vez anvet hiviziken ar strollad galianeg-predeneg. N’eus ket a gontinuom gwir koulskoude etre brezhoneg ha galianeg, rak bez’ ez eus ur hiatus kronologel ken ez eus : ganet an eil pa oa aet egile da netra pe dost.
