Le Nantaez-la, qi denâqhit en 1904, ét le pus jieune des siens q'ont levë les Seiz Breur. En 1922, i s'erive a la Haote-Ecole nacionale des Biaos-Arts de Paris. Aloure q'il ét pus fôt portë pour l'esqhulture, i va encontrer René-Yves Creston, Suzanne Candré et Jeanne Malivel qi chanjera hardiment sa sonjée artistiqe e de païssou. Dame, du temp-la, 'la q'ét la rechomance de p'tites nâçions, de la Finlande a la Catalogne.
En 1925, Jorj (Georges) Robin ét yun des Seiz Breur q'i va a la Montrerie Enternacionale des Arts Miraodifs de Paris. Il amene sa vizée a li su la Bertègn, eyou qe nen vaye deja q'il a ao cai y-étr un grand artist. Li q'a të formë a l'esqhulture, son langaije pllastiqe nous mene a decouvri eune imaijier a l'estile apurë, eune estile vra du temp. Nen treu core son idée d'assayaije artistiqe cant q'i tarvâillera en etrârie o l'ouvraijerie de fayence HB-Henriot. I met les fames ao haot-bout, o, en-méle d'aotr cai, un coupl de ceramiqes : Bigoudène assise e Paludière à la jade de qhi s'orine un grand beghon dizant de simpletë
Tossë de savair qe Jeanne Malivel s'ét mourûe, le 2 du maez de setembr 1926, sti-la dit de yelle a la perzentézon de la montrerie des Seiz Breur de 1927 a Saint-Nâzére : "O sera pour tenant la permiere deheûdouere de l'art naçiona berton." Jorj Robin ét un païssou qi païsse hardi den la vile eyou q'il ét në, en pus d'ela, i mene des pâssées de berton den son ouvrouere e tient son bout etout pour lever le cercl celtiqe nantaez. I croche etout den la brodûre pour ressieudr l'ouvraije a la Jeanne Malivel, a sour fin de concrayer eune mode bertone pour les hanes. En 1927, le compozou nantaez Paul Ladmirault s'aconsorte és Seiz Breur. Amin a Jorj Robin, sti-la ét, parai come Robin, d'amain qe la Bertègn det sieudr le sion de d'aotrs peupllées d'Urope du mitan qi reneuvrissent la muziqe cllassiqe en s'orinant ao pur de la muziqe coutumiere. Le jeune Robin le prie a ecri eune articl su l'Ecole Russe come ezempl qe faot s'oriner deden en muzicolojie pour la gazette Kornog. Ao maez de juïllet 1927, René-Yves Creston e André Batillat li baille le permier limérot de Kornog, meins dame, Jorj Robin ét deja ben bas d'aler...
Les deûz coteris-la seront d'o li diq'a qe la chandelle ét bufée. Le 14 du maez d'oût 1928 Jorj Robin se n-n'ale de la potrine, il a 24 ans d'âje.
