Pour la siance, le ouézé-la s'ahuche Fratercula arctica, de cai qi vieût dire « p'tit frere de l'Arctiqe » en latin. Aoterment d'ela, le perrot-de-mè ét un sien de la famille des alcidës eyou qe n-i a les pingouins e les godes etout. Le perrot-la ét li un p'tit ouézé tout tossinot, grand de 30 cms o 60 de larjou. Nen l'erqenaet d'o son pigot coulourë, ses pates palmées (e pâs-meins i ne li servent de ren etant q'i naije d'o ses eles), meins dame le ouézé-la a mine d'étr entourtë den eune afubllâ nair -dede 'la, ventiés ben, son faos-nom de « mouene » qi ne decache ren qe le bllanc du dessur de ses yeûs, de ses jotes e de son binot.
Les ouéziaos-la dansite la malézée ben des fais, un moment de temp, i taent si tant râles q'i manqhite de deveni a ren. En 1900, parème, i n-n'avaet pus ren q'entr 10 000 e 15 000, des Sete-Iles diq'a Houat.... Les chaçous taent tenant a les poster pour lou chè e lou eûs ao XIXe siecl e i fute etout chacës par des braconous hor-venus, des siens su le dusse ben sûr. Ao maez de jin 1911, M. Loiseau conte qe « la tropelée de perrots-de-mè de l'ile Rouzig a të abolie. L'ile-la retire den un leû de tuerie. Je demuçons de deden les ténes des qhuitous morts, des eûs qi sont depouchës la, tout couvis ; je terouons ren q'eune fumelle a couver e un male-ouézé prés d'un qhuitou fré-fèt de 8-10 jous d'âje. J'apernons aloure d'o nos matelots qe uét jous avant, deûz-traez garcs s'erivite de Paris e se fite depouchë su l'ile o eune qhéssée de 60kg de cartouches. I se n-n'alite q'aprés q'il ont tuë tous les ouéziaos-la, vra bétes ao bon Dieu pâs-meins, tuës durant q'i taent a veni ao nic abecher lous p'tits.
Les côrps és ouéziaos-la (bétôt traez cents, d'aprés) fute ramenës a Perros e dede 'la depouchës su la gréve. Les monsieûs chaçous-la (!), lorieûz o lou chacerie, n'en portite qe ren qe yun ou deûz céz yeûs. D'aprés qe les haches-tout-la font châqe anée des tueries de méme, diotes q'i sont e q'i ne servent de ren (…). Nen peut erterouer la racontée de braconous de méme den eune articl journalizë den La chasse illustrée du 07 de mai 1881.
N-i a pâs ren q'en Bertègn qe nen chaçaet le perrot-de-mè-la, meins. Le monde n'en manjaet etout en Islande ou ben su les iles Féroé parème. Ét pâs-meins, ét ben la chaçerie de laizi-la qi cojit du monde a lever la LPO, la Liance de Pargarderie des Ouéziaos en 1912 e, de st'afére-la, a lever eune aire-nijot privée de ouéziaos. Les ouézeliérs q'avaent decochë le grôs du temp-la perminz de pâsser l'ilerie des Sete-Iles en aire-nijot naturale nacionale en 1976, etout pâs.
Ao jou d'anet, biao qe d'étr terjou garantie, la peupllée de perrot-de-mè ét a s'apetiçer. L'ôtë de pargardance LPO de l'Ile-Grande (Pleumeur-Bodoù) ne conti, a l'etë 2016, ren qe 130 coupls su l'ile Rouzic, la seule ile eyou q'i n-n'a yeune de peupllée, tant q'i taent core pus de 8000 den les anées 1950. Pourqhi caoze don ? Les marées naisses qi n'se donite pouint le tour en Bertègn depés berouées e anet l'erchaoferie du cllimat. O les tempirnatures a cretr, les paissons se n-n'alent âillou e les perrots-de-mè n'ont qe d'aler de pus en pus lein pour n'en pecher, de cai qi les aboute. Maogrë q'i peuvent atraper lou 25 ans d'âje, i n-n'a de meins en meins des perrots-de-mè d'aotant pus qe les meres ne pondent ren q'un seul eu châqe anée entr le bout d'avri e le maez de mai. En pus d'ela, les perrots-de-mè se nijent a bâs, de la secousse il ont les rats qi peupelent den les iles de méme a lou coure su le dôs. Sans conter des cagnâs etout, e i n-n'a a rest des ouéziaos-la mézë raport és jailles qe nen treûe un p'tit partout. Carvaniérs, les cagnâs-la s'entr-pernent és jieunes durant qe les grands sont a chacer le sprat.
E pés, les lumieres de la côte mettr les p'tits pouliaos a devietter. A lou permiere avolée, les vla denordës e i sont ataïnës a s'en reveni devers la terre tant q'i devraent putôt aler a-rebou, devers le champa a aprindr a chacer. En Islande, n-i a un nouviao amouézaije qi s'orine d'ela : des garçâilles sont a ghetter les perrots-de-mè adirës pour les reqheûdr den des cartrons avant qe de les lésser coure d'ertour le jou d'aprés. Sinon les p'tits boudets-la, les p'tits pouliaos-la se mouriraent.
