Alan Stivell a l’Olympia en 1972

Les sonous bertons se debotent a l’Olympia

La sonerie-la a të menée den l’encadrure d’un Musicorama perpozë par Lucien Morisse, menou des pergrames d’Europe 1. Pour n-n’enterluzer coment q’ole a të conseqente la donée-la, faot doner la rolée de tertout les siens qi passitent den la siene-la : Leonard Cohen, Peter, Paul and Mary, Simon & Garfunkel, the Band, the Byrds, Chuck Berry, Jimi Hendrix, Sly and the Family Stone, Janis Joplin, Judy Collins, Pete Seefer, Joan Baez, Richie Havens, Buffy Sainte-Marie…

Su les chafaods, Alan Stivell : chanterie, harpes celtiqes, fllûte irlandaeze, bombarde ; Gabriel Yacoub : ghitare, dulcimè, banjo, chanterie ; Rene Werneer : fiddle (ventiés dulcimè etout) ; Pascal Stive : clleviérs ; Gerald Levasseur : ghitare-bâsse ; Henri Delagarde : violoncelle ; Dan Ar Bras : ghitare letriqe e acoustiqe ; Michel Santangeli : jâze ; Serj Parayre : qhésse cllere ecoçaeze ; Mik Le Biz : bombarde ; Michel Clec’h : fllûte, i vezonent, vezonent qi n’vezonent.

Le live enghernë den la berouée-la montere ben le pllézi qe le monde ûrent a acouter le sair-la, tant q’i cotirent les pognes, durant qheuqes morciaos de sonerie etout. N-i a terze titrs su la galette 33 tours – pâssë le permier, i sont tous des éres de tradicion ramarées par Stivell : The Wind of Keltia, le vra rock Pop Plinn, An Dro, The Trees They Grow High, An Alarc’h (chant de gherre en sourparlement de Cornouâille orinë le Barzaz Breiz), An Durzhunel, Telenn Gwad, The Foggy Dew (chant qi alôze les combatous du deheûdaije de l’Irlande, ecrit 1919), Tha mi sgith, The King of the Fairies, Kost ar c’hoad, la Suite sudarmoricaine q’ét ben de la qenûe (entamâ de sonerie sieudu par la chanson menierement guediere Pardon Spezed) ; e pés, c’ét durant est’Olympia qe Tri Martolod fut chantë e enghernë seben, avant qe de deviendr ene chanson vra de la qenûe, egâillée den les petits posts e chantée den la teledevizouere, esperée ou demandée ben des fais par le monde és soneries de Stivell. Ça q’ét ene ronde a touéz pâs qe nen troue su toute la côte de Bertègn, pus fôt core den l’A-bâs de la Cornouâille. C’ét l’istouere de touéz jieunes peletâs partis en mè devers Terre-Neuve, pâssée devizée amoureûze entr ene chamberiere qe le sien a nârer, un pôvr garc, vouraet s’etablli d’otout. C’ét cant q’i taet core më-venu qe le chantou terouit la chanson-la, rasserrée par Polig Montjarret o le titr Tri-ugent martolod (60 peletâs) den sa rassererie d’éres pour grand-vezes. Alan la ramarit o un entamâ a la harpe celtiqe a cordes en metal, tant reqenéssabl, e vela q’o fut jouée ao dret du monde-la. E c’ét tout pllein de hait q’i la z’ercepirent tout fin sieute.

Stivell a la vogue

Durant la sonerie, les ergardous se taent minz a danser tertout, ni pour qe la sale de l’Olympia n’avaet pouint të fète pour ça e le riguedaod ressieudit dehô. Den Racines interdites, Alan Stivell donit pus fôt de ghiments su son demelaije de la sonerie : « D’o les chansons de tradicion ouies durant qi taet jieune, nen ne decessit de li dire q’i taent vaillotes, begaodes ou pâssées de temp, le peupl berton ét su les chafaods de l’Olympia, den un endret erqenû, de ghize [...]. Taomée sicolojiqe : les jieunes Bertons, menës par les soneries ameriqhenes ou angllaezes s’avizent qe la sonerie bertone vaot ben aotant come yeûs, qe nen peut chanter en berton etout. Les vieûs pouint dits fadissent. Un monde remouchë ressourd a grandes enqhillées. » I dira pus tard, parai, qe jameins aoparavant i n’araet sonjë qe la sonerie peje avair un efet de méme pouint sourment su les Bertons, meins su le monde françaez etout.

Du coup-la, la sonerie bertone e celtiqe avaet la vogue. Dés le mouéz de mai, l’album live fut bani e zû la présse ; d’aprés Yann Brekilien, 150 000 galettes aperchant furent vendues en ene anée de temp. E depés, ben pus fôt (pus de 2 milions, q’o dit la Marie-José Cochevelou) ! Dés l’etë, nen qemancit a le oui, e a l’otone, Alan Stivell taet de la qenûe aoprés du grand monde den tous les endrets de France. Des tournées ao través le payiz sieudirent, ao través le monde parai, e berchôze d’albums, eyou qe le chantou e sonou berton reste leyaod a la tradicion e enouviaoze tenant son cai, o des harpes nouveles e des estiles de sonerie nouviaos.

La « berouée Stivell » fut maitië pâs creyabl. I donit le tour a berchôze d’aotrs artists de sieudr la vae-la e fit aqenétr la sonerie bertone seben meins la qhulture bertone e celtiqe etout.