Komzoù brezhoneg a zo un heuliad pennadoù video enrollet gant Lors Jouin evit dastum komzoù gant tud brezhoneg, hag evit kaout un tañva deus liester ar parlantoù hag an taolioù-mouezh e brezhoneg.

Tregont video a zo bet produet gant Skol Vreizh ha 6 kenbroduet gant sikour Bretagne Culture Diversité. An destenn a zo bet skrivet evit pep pennad (ur stumm “komzet” hag ur stumm adskrivet hag adlennet gant Francis Favereau), evit sikour ar re a zo o teskiñ da gomprenn ar pezh vez lavaret en ur kaout pinvidigezh ar yezh komzet.

Da welet war lec’hienn Bécédia : http://www.bcd.bzh/becedia/br/komzou-brezhoneg.

Ur skouer, Armand Le Goff deus Karaez :

E 1998 ‘oa bet dalc’het Gouel broadel ar brezhoneg ‘ba Langoned evit ar wech diwezhañ. d’an 19 hag an 20 a viz mae o tont e vo lidet ar brezhoneg en dro ba’r bourk !

Ur program pinvidik a vo kinniget d’an dud : sonerezh, c’haoriaoù, sinema, prezegennoù… peadra ‘vit kemer plijadur e brezhoneg !

Ur stand a vo dalc’het gant Bretagne Culture Diversité ‘vit brudañ pezh vez kinniget d’ar vrezhonegerien ganeomp (Bazhvalan, Bécédia…) d’ar sadorn 20.

Digor eo Bécédia abaoe ar 26 a viz genver tremenet. Plediñ a ra Becedia gant danvezioù a bep seurt : istor, geografiezh, tudoniezh, sokiologiezh.

Dedennus eo koulz evit ar re a fell dezho dizoloiñ hag ar re entanet, hag ivez evit ar gelennerien a fell dezho pinvidikaat o c’hentelioù. Pep grefen a zo studiet gant un arbennigour war an danvez ; e-giz-se e vez savet tamm-ha-tamm un hollouezhiadur dibar, lies e stumm ha nevesaet dibaouez.

Danvez e brezhoneg

Ouzhpenn 70 teul tematek e brezhoneg a vez kinniget hiziv war al lec’hienn. Kavout a reer ivez 12 tamm deus ar web heuliad “Gwir vretoned” hag holl abadennoù Sevenadurioù kinniget war ar rouedad Radiobreizh.

[Mont war Bécédia]

D’ar 27 a viz genver o tont e vo digoret « Bécédia ». Kinniget e vo gant al lec’hienn nevez-mañ an holl danvez produet gant BCD/Sevenadurioù Breizh (doserioù tematek, dafar evit ar skol, diskouezadegoù niverel, teulfilmoù-web, abadennoù radio…).

Lies eo an tachennoù studiet : an istor, an douaroniezh, an tudoniezh, ar sokiologiezh, ar sonerezh, an arzoù, ar glad sevenadurel ha naturel, ar yezhoù, ar gevredigezh… An holl danvezioù-mañ a ya da sevel un holloueziadur unan ha dibar, lies ar stumm kinniget hag adnevesaet e vo ingal an titouroù. Digor eo al lec’hienn-mañ d’ar re a fell mont pelloc’h gant danvez Breizh met ivez d’ar gelennerien a fell azasaat o kentelioù. Pep tem a zo diorroet gant un arbenigour.ez.

Emgav d’ar 27 a viz genver !

Ur wech ar miz, d’ar Gwener da noz, e vez pedet brezhonegerien bro Roazhoñ da bakañ banne o kaozeal brezhoneg. E Skol an Emsav e vez staliet an Davarn vrezhonek. Ezhomm ‘z eus, eme an aozerien, da gaout seurt prantadoù evit kaout un digarez da vrezhonegiñ, evit ar re a zo o paouez deskiñ brezhoneg kement hag ar re all.

D’ar 14 a viz Here e oa bet pedet kevredigezh BCD/Sevenadurioù da ginnig raktres Bazhvalan. Bet eo bet neuze Lena Catalan Marcos o tisplegañ petra eo kevredigezh BCD/Sevenadurioù ha petra ‘vez graet ganti evit pezh a zell ar brezhoneg – hag ar gallaoueg – gant ar raktres Bazhvalan. Anv a zo bet eus an treuzkas, eus pinvidigezh ar brezhonegoù ha eus diaesterioù ar vrezhonegerien nevez pa glaskont kaozeal gant tud a oar ar yezh a-vihanik. Un tregont den bennaket a oa deuet, en o zouez tud a oa o paouez komañs gant ur stummadur 6 miz.

Amzer o deus bet an dud goude-se d’ober goulennoù hag evezhiadennoù, ha da gaozeal oc’h evañ ur banne. Emichañs e servijo lec’hienn Bazhvalan da galz anezho.

War ar porched radiobreizh.bzh e vez kavet abadennoù produet gant ar pevar radio a ya d’ober ar rouedad « Brudañ ha skignañ – Radio Breizh » : Arvorig FM (staliet e Landerne, 29), Radio Bro Gwened (Pondi, 56), Radio Kerne (Ploneiz, 29), ha Radio Kreiz Breizh (Sant-Nigouden, 22).

Podskignadoù abadennoù brezhonek RCF Penn-ar-Bed (Brest, 29) ha re c’hallouek Plum’ FM (Serent, 56) a vez kinniget ivez.
Ur benveg pinvidik, fetis hag aes da implijout a ro an tu da Yann Vrezhoneger ha da Gatell Vrezhonegerez da selaou brezhoneg dre ar rouedad e n’eus forzh pelec’h e vefe o chom, e Kanuel koulz hag e New-York !

Ur mor a abadennoù prizius en amen d’an holl, da selaou ha da adselaou, e lec’h ho peus c’hoant a-drugarez d’ar skignadur war-eeun met ivez gant ar podskignañ, ha kement-mañ evit netra.

[Gwelout an dielloù war Bretania]

An dour vez evet, an dour vez implijet evit al labour, an dour benniget hag all : puilh eo an tem pa vez studiet talvoudegezh an dour er gevredigezh hengounel hag an holl gredennoù ha brizhkredennoù tro dro d’ar feunteunioù.

Laurent Gall, ethnolouzaouer, hon eus bet ar blijadur da zegemer evit lakaat ar gaoz war ar pradoù dourek hag ivez war ar beler pe kressen-dour.

[Da selaou en-dro dre amañ]

Da heul Gouel daouvloaziek al levrioù istor bet dalc’het e Pondi e fin miz Ebrel diwar-benn ar sport hag ar Redadeg evit ar brezhoneg loc’het n’eus ket pell ‘zo eus Sant-Ervlan hag a yelo war droad betek Lokoal-Menton, setu ni o pleustriñ gant an tem-mañ ivez !

Er rubrikenn Aktu e vo graet un tamm bilañs eus ar stummadur TAP pe POT e brezhoneg (Prantadoù Obererezhioù Tro-Skol) kenaozet gant BCD hag ar CNFPT.

Gant : Kenan An Habask, Helori Ar Gall-Carré, Roue Visant, Nicolas Amaury

Da selaou dre amañ :

Un emvod publik a zo aozet d’ar 4 a viz Gouere e Lokeoret evit displegañ d’ar boblañs palioù ha mod implij renabl ar glad sevenadurel dizanvezel e Bro Kornôg Kreiz Breizh.

Krog eo BCD/Sevenadurioù Breizh da sevel renabl glad sevenadurel dizanvezel Bro Kornôg kreiz Breizh gant sikour ar bodad Sevenadur Kuzul diorroiñ ar Vro ha dilennidi kumunioù ar vro. Holl lodennoù ar glad sevenadurel a vez taolet pled outo war an dachenn etrevroadel gant ar Feuremglev evit gwarez ar glad sevenadurel dizanvezel skrivet e 2003 gant an Unesco.

Fellout a ra d’an holl aktourien-se labourat asambles gant ar boblañs evit nevesaat ar ouiziegezh a zo war gladoù ar vro, penaos int bevet ha penaos e tegasont fouge ha peseurt skeudenn pozitivel ha dedennus e roont d’ar vro.

Padout a raio ar renabl e-pad pevar bloazh hanter ha meur a zarvoud a vo aozet a –hed an oberiadenn (kenstrivadeg, stalioù-labour evit ar skolidi ha liseidi, prezegennoù, emvodoù publik…).

Penaos e vo aozet ar renabl-mañ ?

Renabliñ ar glad sevenadurel dizanvezel a zo studiañ ar pleustroù bev c’hoazh hiziv e meur a zachenn : an artizanerezh hengounel (kantennerezh, gwiskamantoù) ; an anaoudegezhioù liammet ouzh an natur  (implij ar plantoù gant perzhioù mezhegel, diskoñterien, skiantoù-prenet war an endro) ; al lidoù ha gouelioù (pardonioù, meurlarjez, fest-noz, kenstrivadeg sonerezh) ; ar binvioù sonerezh (klarinetenn / treujenn gaol, violoñs, biniou, bombard, akordeoñs) ; ar glad dre gomz (sonioù ha gwerzioù, kontadennoù, rimadelloù, mojennoù…) ; ar yezh.

Ur wech renablet an holl elfennoù-se e labourimp da wareziñ ha da vrudañ anezhe.

D’an holl eo da gemer perzh e renabl glad sevenadurel ho pro

Pedet eo an holl da gemer perzh er renabl-mañ, da lavarout eo pep prantad deus ar raktres-mañ a sell diouzh pep anezad deus ar vro. Da bep hini eo neuze da lavarout deomp petra a zo glad pe hêrezh sevenadurel hervezhañ, ha penaos e fell dezhañ brudañ ha skignañ anezho.

[bloc-gris]

Evit kompren gwelloc’h palioù ha mod implij ar renabl ez oc’h pedet d’un emvod publik a vo aozet e Lokeoret d’al lun 4 a viz Gouere e sal ar gumuniezh-kumunioù da 8 eur noz. Pedet oc’h da zont da gemer perzh d’an devezh-mañ ! Deuit niverus !

[/bloc-gris]