Durant berouée, les tarvâillous ont dû se haner o de cai q'il avaent entour de yeûs. Come 'la taet 'la taet. I s'aberiaent les qhettes o des rabillës de hanes de tous les jous : les perriérs avaent des houziaos en pillots qi tenaent o des morciaos de bouzines rabillées parème, les fendous, les sabotiérs ou ben core les ferrons avaent yeûs des devantieres renforcies e pour les gouemonous du Leon 'la taet des surtouts e des capichons come le kalaboussen, un meniere de grand capot. Come q'i taent a tarvâiller, les marins avaent, yeûs, su le côrp des grandes afubllâs, les kapo bras, prinz den la taile, la méme qe pour les voueles de lous batiaos. E cant q'i taent ao bat, pour se garanti de la pllée, de la berouacerie e des vents, il avaent des "ciraijes" su le côrp, ét a dire des pimpères fèts o de la taile uilée o de l'uile de ligne pour q'i seraent atanches.
Den la deûzieme maitië du XIXe siecl, o la revoûsserie uziniere, la mecaniqerie e les grands travaos, les manouveriérs font hardi de lous côrp e jouent des bras etant qe le tarvâil ét dusse du temp-la. Les manouveriérs-la chouézissent don des tétûres qi lous font de l'endon e qi sont dusses a saveter, i chouézissent etout des formes ajuties ao côrp pour pâs qe les couraes e les enguernaijes crocheraent den les hanes. Petit a la fai, les manouveriérs aront des "compllets" eyou qe le paletaod e les brées sont d'assembl : le "blleu de tarvâil" parème qi peupele a conter de l'entamâ du XXe siecl.
Durant berouée, meins, hardi aront ren qe des beloueres. Maogrë q'i ne garantissaent pâs grand cai, les minous de la mine de pllomb d'arjient de Lokmaria-Berrien en 1839 n'avaent ren qe les beloueres-la su le côrp. Des beloueres seront etout bâillées és ajissants de la poûdrerie de Pont-ar-Veuzenn en 1845 come ene alotement de hardes.
Paravant, les permiérs manouveriérs d'ouvraijerie ont zû de luter contr les amouézaijes de la societë bertone coutumiere eyou qe les siens q'i ne se pouillaent pus a la mode du payiz, si qe n-i a pouint afére de le fére terjou, 'la taet parai come de se deqeneûtr, ou ben pus pire core, a aler a la valdrague. Ét de cai q'ecri Pêr-Jakez Helias en 1975 den "Le Cheval d'Orgueuil" parème. En pus d'ela, 'la y'a të ben de la luterie pour qe les hardes de tarvâil ne seraent pâs ren qe su la boursée és ouveriérs, etant qe, du temp-la, n-i avaet ren qe les enterprinzes d'Etat qi baillaent des alotements de hardes. Vaila pourqhi q'en 1929, la manouvraijerie des tabacs de Montroulez fezit fére 210 beloueres, 240 brées e 25 sârots.
Nen vaye ben l'erreur qe n-i a entr les blleus de tarvâil bâillës par la manouvraijerie, tertout parai q'i sont, e le sârot bllanc q'ét su le côrp ao contermétr, les hardes de l'enjinandier e la gârerie de hardes des fomes, etant qe les hardes-la sont pouint bâillées par l'enterprinze.
Des nouvelles aparessances
Ét o de a merchanderie ben sûre, ben d'amain, o des calitës de propretë e ézée a fére qe les fezous de hanes vont terouer le tour de garanti és tarvâillous e és enterprinzes de les avivander a mâsse biao q'i s'atendent su des ouvraijeries du Haot pour la tésserie e la tégnerie de téture. Dés aossitôt 1913, la merqe Le Mont St Michel, orinée de Pontorson pés aleutée a Rene ghette a vendr ao monde ouverier come és siens des campaignes de Bâsse-Bertègn, o des taolées en berton come « dilhad labour, dilhad nevez atao » ou ben « dilhad labour, nevez bepred » qe nen pouraet tourner de méme : "hardes pour tarvâiller, terjou come fétes d'a matin !"
Ça ét de méme pour les merqes Le Glazik, les Bonneteries d'Armor pâssées Armor Lux a Kemper ou ben core la societë Dolmen den le payiz de Ghingamp. Depés 1934, l'ouvrouere ao métr-tâillou du port de mè de Brest fèt châqe anée des berouétées de paletaods, de brées, de cheminzettes e de blleus de taile pour les ouveriérs de l'arsena en pus des afutiaos pour les marins de la Marine nacionale.
En 1898, den ene recllame journalizée den "L'Ouvrier du Finistère", l'ôtë Roubaud "se consaille a la cllâsse ouveriere pour la bone calitë de ses amares pouint coûtaijouzes de trop."
Den le méme secant, den les anées 1900, des abillous ben de la qenûe (Braillon, Belle Jardinière, Leconge e Willmann, la Manufacture de Saint-Etienne...), q'ont des revendous en Bertègn, vendent des hanes uzinées. Aroutinës és coulourants uzinës o qhi q'il amendent les couloures naturales e o qhi qe les teintes s'entr-tienent ben cant qe 'la revonje, lous buraos des draps cerchent core a forci l'andon des tétures. 'La n'empôzera tout come pouint qe des couzoueres vayaijantes ou ben core a demoure tarvâilleront core durant berouée a assembller, monter e daboner, de cai qi elegnera pour un petit de temp core le monde des ajetaijes coûtaijous den les etas de hardes de tous les jous.
Gernuche a garnâille, a conter des anées 1880, en pus des aparessances ressentantes de saqhuniere nen vaye des hanes especifiqes a des qemunaotës de métier : les afutiaos blleus des manouveriérs, les beloueres és comiz e fètissiérs, les sârots des cllâssieres e cllâssiérs, les tuniqes des souégnous, les brées e paletaods és siens des buraos... Qheuqes fais s'orinant su les uniformes mirlitéres, les afutiaos és bouétiérs e és siens de la gâre monterent les donézons economiqes de l'Etat a tertout, tant qe, les tuniqes, les brées, le col oficier e le qhepi és permiérs ajissants des fezanderies qemunales monterent ben, o qheuqes rampampères ventiés, la maniance de la police des viles.
Les hanes pour tarvâiller : un langaije
Ao coup qe les ensegnous e les comiz de burè pernent a mâsse la bllaode, dabonée qheuqes fais és manches o des lustrines pour ne pouint se bernouzer, les afutiaos-la servent d'aotrs : avair grand chieu. Des dirijements oficiaos dizent coment qe les ensegnous ont de se tiendr devant le monde, les cojant a se haner "ben de sorte e a avair du chieu" ; le monde ont le pigot chaod o les "demouézelles du haopouer" ou ben core les "steno-dactilo" qi montreraent lous pë e lous tete raport a q'il ont pouint de belouere a qhuter lous côrp. En pus d'ela, den les ouvraijeries ou den les ouvroueres, la belouere fighure qhi qi mene : n-i a ren qe les contermétrs qi sont hanës o des sienes bllanches. Les uziniérs s'avizent ben de la possibletë ressentante des hardes de tarvâil e, a conter des anées 60, yeûs-ci sont benézes de fére des hardes-imaijes a sour fin de valenter lous merqe.
De l'estandardizézon a la normaozance
Dés aossitôt les anées 1950, o les chandelles q'alumite les graves atouts qe n-i a zû en Bertègn den les enterprinzes de l'agro-vivature, les uziniérs mettent lous gaijës a se grayer o des dayots, des paometets, des côrps de noû, des devantieres especiales. Fèt pour garanti le côrp des ouveriérs e ouverieres, les grayements-la sont les permiérs des grayements pour garanti chaqhun (GGC/EPI) qi peupeleront a conter des anées 90 den ene pouillerie qi sera ben normée admézë.
Dede la, afutiaos de tarvâil, houziaos de sûretë, solérs croghille, hardes haote-vayabletë, jiliaos afllotants, caxe, mains pour se garanti, pâssent aparessances du tous-les-jous, etout pâs su les chantiérs de travaos publlics, les uzineries, les ouvroueres, les ouvraijes tecniqes des aguerouées de payiz... qe su les batiaos de paiche, les batiaos-uzineries, les charaye-contenouérs...
Aparessances ancienes meins uzaijes nouviaos
A conter des anées 1950, en pllace qe de rester den les leûs de tarvâil e d'étr ren qe des hardes pour tarvâiller, petit a la fai, d'aoqhunes vont pâsser simboles sociaos e identitéres. Le cirë parème, la mariniere ou ben core le "kab an aod" és gouemonous du payiz Pagan, qi taent d'aotrfai, ren qe des hardes de marins a tarvâiller. Les hanes-la se retreûvent admézë su le côrp és tourists ou ben core és sonous bertons, és artists e diq'és jieunes vilotins qi sont benézes de méme d'amontrer ao monde lous "bertonitë". Pus fré core, den d'aoqhuns mitans, 'la q'ét la vogue de depoucher les hanes de tarvâil, de cai q'ét ene meniere d'amontrer ao monde q'en ét erchignë. Vaila pourqhi q'a l'entamâ de 2020, a An Oriant, Saint-Nazere ou ben core Kemper, des souegnoueres depouchite lous belouere pour s'erchigner contr un projit de ramarerie des retirances, tant q'a Saint-Berieu, Naonte e Caen, des avouës fezaent de domë en huchant "J'e ma a ma cote".
