Deuet eo ar strollad da vezañ Drapeau Rouge (banniel ruz) ha war-lerc'h an Organisation Communiste de France (ML) (aozadur komunour Frañs (marksour-leninour)), ha ret eo ouzhpennañ c'hoazh - pezh n'eo ket ur munud - e vo cheñchet an ML (evit Marksour-Leninour) gant un D evit Demokratel goude 1981. Dont a ra an OCF(ML) da vezañ OCF(D) neuze. Penaos en deus gellet ur strolladig bet savet e Roazhon e 1970 gant daou pe deir dousennad stourmerien aet kuit eus an Humanité Rouge peogwir e kave dezho ne oa ket oberiant a-walc'h e bed ar vicherourien, penaos en deus gellet ar strolladig-se ober annez e meur a gêr all e Breizh (Brest, Felger, Lannuon, Naoned, Redon...) ha war-lerc'h e kêrioù bras Frañs betek dont da vezañ unan eus ar strolladoù maoour o deus padet ar pellañ ?
Abalamour d'e linenn bolitikel a oa he c'halon mont war-zu renkad al labourerien. Tonioù poblelour a vo klevet ganto a-wechoù memes tra, met ar mennozh-mañ a gaso kalz a studierien da labourat en uzinoù pe war ar chanterioù. N'eus ket ur mor a dud a emezelo gras d'ar stourmerien yaouank-se met ul liamm gwir o do gant ar bedoù poblek ha kemer perzh a raint en o en emsavioù. O vezañ ur strollad lec'hel-rannvroel da gentañ int bet gwarezet ivez moarvat a-enep d'ar rendaeloù ha d'an tabutoù teorikel difin a vac'he ar strolladoùigoù « broadel » kenetrezo. Pezh ne dalvez ket ne blije ket dezho prederiañ war an teoriennoù.
Pajenn gentañ ar gazetenn Arguments © Dastumad prevez an oberour
Drapeau Rouge a vo un aozadur lec'h ma veze lennet - dindan ar frazennoù marksour ofisiel - preder e izili, a gave dezho e oa ret soñjal an amzer-vremañ pa ne oa ket displeget dija gant an dogm, pezh a vo gwir betek dibennoù e gelaouenn Arguments (1984-1988). Setu perak e voe klasket ganto kompren diazezoù sokial tu kleiz ar programm boutin, prederiañ war ur gomunouriezh ne vefe ket totalitaer (betek ouzhpennañ « demokratel » en o anv diwezhañ). Ha pa oa taer an eneberezh etrezo, an OCF (implijet eo bet an teskanv adalek 1975) a zo bet, e-barzh tachenn al luskad maoour, heñvel a-walc'h ouzh al Ligue communiste el luskad trotskour : un aozadur digor da virvilh sokial ar bloavezhioù 1970, a rae gant goulennoù da zirouestlañ kentoc'h eget respontoù prest ha-tout. E bennoù a zo anezho alies prederourien bleustrek a lak ar gaoz da servijout an ober, hag e-keñver aozadurioù all int tud « vevoc'h » ivez – klevout a reer ar ger e testenioù stourmerien gozh -, nevezerien, tud laouenoc'h anezho.
Pajennoù kentañ kazetenn Drapeau Rouge © Dastumad prevez an oberour
