Touristelañ ar fardelloù er stankelloù : skouer Arzhal

Aozer : Johan Vincent / Genver 2021

Da heul broadelañ ar fardañ tredan e dibenn an Eil Brezel bed ez eus bet savet meur a stankell : ouzhpenn 100 etre 1945 ha 1960, betek ma voe roet ar brioriezh d’an nukleel. Dre ma oa bet liesaet ar fardelloù ha diorroet kevredigezh an amzer vak war ar memes tro eo bet lakaet an dilennidi da soñjal e c’hellfent sevel kreizennoù dudi, ha porzhioù bageal zoken, ma vefe tro. E Mor-Bihan an Argoad eo bet soñjet gant ar SATMOR kempenn daou lec’h : e Ploermael, war lenn an Dug, hag en Arzhal, war ar Gwilen.

E 1970 eo bet lakaet stankell Arzhal da vont en-dro. E-barzh soñjoù an dilennidi, hag hervez komzoù bet distaget da geñver un emvod a oa bet dalc’het e Redon un dek vloaz bennak a-raok, ouzhpenn mestroni an dourioù e ranke reiñ an tu da ziorren an douristelezh war al lec’h. Evel‑se ez eo bet savet ar fardell, un dra vat evit gellet sevel ur porzh bageal kloz en aber ar stêr Gwilen. Meur a lec’h-eoriañ a gaver uheloc’h eget ar stankell met ne oa bet aozet tra ebet e-doug ar bloavezhioù 1970. E 1979 eo bet dereet aotre ar porzh 600 plas da sindikad kemmesk porzhioù ha lec’hioù merdeiñ ar Mor-Bihan. Daoust da‑se he doa ranket ar C’HETMOR talañ ouzh kudenn al lochoù niverus savet diaotre er c'hein-vro, gant penn‑kentañ ar c’hampiñ hag ar c’haravanennoù war dachennoù prevez (okupet e veze tachennoù prevez gant annezioù dindan an amzer), abalamour ma veze peur‑leuniet an tachennoù kampiñ aotreet. Breskaet eo bet neuze ar programm sevel-tiez e‑liamm gant ar porzh bageal. Divodet eo bet e 1982, ne gasas ket ar raktres da benn vat, ha rannet eo bet an aveadurioù etre meur a hini. E 1985 e tivizas kuzul‑kêr Arzhal kas en‑dro mestroniezh al labourioù evit sevel ur gêriadenn‑vakañsoù war un dachenn a oa da Gevredigezh terkañ ar Mor-Bihan he doa kemeret plas ar C’HETMOR), e‑liamm gant Aozadur ar c’hampoù hag ostalerioù yaouankiz (OCCAJ) evit kêr ar bodoù-ehan. E 1992 e oa echu gant an aveiñ tachenn oberiantizoù stankell Arzhal.

MENEGIÑ AR PENNAD

Aozer : Johan Vincent, « Touristelañ ar fardelloù er stankelloù : skouer Arzhal », Bécédia [en ligne], ISSN 2968-2576, mis en ligne le 11/01/2021.

Permalien: https://bcd.bzh/becedia/br/touristelan-ar-fardellou-er-stankellou-skouer-arzhal

Kinniget gant : Bretagne Culture Diversité