Le latinier-la ét sorti de la Touraine eyou q'i denâqhi en 1889. Minz den l'armée en 1914 e atijë den l'infantrie i ressieu, dede 'la, den la gherre come aviatou de combat : i n-n'ara 4 bllecures, cinc alôzeries, la Lejion d'Oneur e pâssera capitaine. André Dezarrois va, de ça, devers la banisserie d'art e les muzës. I rechome eune gazette artistiqe, aïde ao pargardier du muzë de l'Orangerie pés mene le fré-bâti muzë du Jeu de Paome q'ét levë en 1922. Par aprés, i assaye de saover des ouvraijes abstrets qe les nazis v'laent ne fere eune fouée. Pour ela, i les montrent a Paris o le nom "art enternaçiona deheûdë".
André Dezarrois ét un sien de l' Union Rejionalist Bertone (URB) e du Gorsedd (1938 e 1939) qi aprend le berton. I s'achiéne a sieudr les alivetées qhulturales bertones e s'aconsorte ao Bleun-Brug. Diot de Saint-Mâlo eyou q'il a ajetë eune ôtë, i qenperzide la Societë d'Istouere e d'Arqeolojie e hante le peinturou Jean-Julien Lemordant meins etout Yves Hémar, James Bouillé, Xavier de Langlais e René-Yves Creston, qi sont des Seiz Breur tertout. André Dezarrois aïde a lever le pavillon berton ("Ty Breiz") a la Montrerie universale (Montrerie enternacionale des arts e des tecniqes minz a jouer pour la vie d'astoure) de Paris en 1937.
Ao maez de setembr 1939, a caoze de la gherre, le v'la core a aler den l'armée de retour. I barghigne pour qe l'amin britaniqe seje deden etout, meins o l'arevers, sti-la ét minz den le panier és retailles par le rejime de Vichy. Dede 'la, le v'la qe de s'enroler den eune rouétée de la Rebourserie eyou qe n-i a un souéton de qemandous qi va lever l' Organisation civile et militaire. En 1941, i tient son bout pour lever l'Institut Celtiqe eyou q'i retreu les païssous qhulturaos bertons e le muzicologue Georges Henri Rivière, q'ét a mener aloure le Muzë naciona des arts e tradicions populéres. En 1942, il ét nomë a la Consultée consaillouere de Bertègn a sour fin de mettr du cllapè den la qelée des recllameries, biao q'il ét d'agrë pour tout c'q'a a-revaer o le qhultura. Ao maez de jin 1944, il ét serrë den son châtè de famille de Touraine o des soudards alemands. I chane e s'en retourne en Bertègn a veloce, les parchâs de sa souéte de reboursous d'o li. Dede 'la i pâsse oficier d'entr-liance den l'armée du jenera Patton.
Aprés la Déheûderie, André Dezarrois se perzente ao comissére de la Republliqe Victor Le Gorgeu a sour fin de li recllamer qe les avanjées qhulturales pour la Bertègn seraent garanties. I n-n'ara zû de l'avanjerie : le v'la encastéouanë ao camp Margueritte a Rene, parai come hardi de païssous qhulturaos ou politiqes bertons, soupçonës q'i sont tertout, q'il ont fét de cai ou ben pouint, d'avair tarvâillë en etrârie d'o les Alemands. Debârë qheuqes semenes pus tard, il ét minz qemandou de la Lejion d'Oneur e nen li baille la medale d'etourou benvoulant de la Rebourserie. I sera reminz den ses cherges den les muzës nacionaos. Le grand bourjouéz-la fut yun des grands emou de la Bertègn e de sa qhulture, aossi ben la coutumiere qe la siene du temp, e eune opozou ataïnë a tous les totalitarisms.
