Jeanne Malivel ét née-native de Loudia eyou q'o chaet su terre en 1895 den eune famille de marchand. O poûsse és ecoles a Rene eyou qe son ensegnouere de dessin prend merqe a yelle. En 1915, qe la gherre ét la, o pâsse souégnouere a l'ôpita mirlitére de Loudia. En 1916, la jieune artist-la se n-n'ale poûsser és etudes a l'academie Julian, eune ecole privée de peinture e d'esqhulture a Paris. O s'aconsorte a la Ghilde Notere-Dame, qi a citrape, du temp-la, de ghetter den les doqhuments de la qertiènetë du më-âje de cai ennouviaozi l'art sacrë. Durant q'ole ét a pôusser és Biaos-Arts, Jeanne Malivel va és pâssées pour aprindr les parlements e les ecrivaijes celtiqes ao Colaije de France, en pus des pâssées de berton ao Cercl Celtiqe. En 1919,title="Qheuqes des ouvraijes a la Jeanne : peintures, qerionées, aqouarelles, imaijeries de livrs (bouéz cizelës), gravûres pour la gazette Feiz ha Breiz, miraodézons de murs, tailes, brodûres, bezaignes pour le tous les jous, meubls, arts du feu, vitraos."placement="left"eute-late /tooltip] s'aconsorte ao nouviao souéton berton q'a nom "Unvaniez Yaouankiz Breizh (Union de la Jouvantize bertone) qe sa gazette ét Breiz Atao. Den le souéton-la ole aqenaet hardi d'artists bertons qi restent a Paris, come René Quillivic, James Bouillé ou ben core René-Yves e Suzanne Creston. Ole ét etout yeune des pus fameûzes renouvroueres de la gravûre su bouéz en Bertègn. Les 74 imaijeries de l'Istouere de nôtr Bertègn, ecrite par Jeanne Coroller-Danio e qi taet permier pour la garçâille ét de son fezi parème. 'la n'empôze pouint q'o n'taet pouint d'agrë o son idée naçionalist.
Jeanne Malivel enjine etout du meubl pour son monde ou ben ses amins. O le meubl-la, ole a citrape de ranouvri les arts de fezis. Yeûs-ci sont, ben des fais, orinës du meubl qe nen treu den le payiz de Loudia. Yeûs-ci sont du fezi d'ebeniérs de Bertègn come le Julien Bacon a Caorel, Christian Lepart a Rochefôt ou ben core le Gaston Sébilleau a Rdon.
N-i a des fais, les ouvraijes-la sont mile-couloures. O dessine toutes les ferrûres de ses meubls e o demande a un ferron de Loudia de les fere. O bani eune articl eyou q'o haope le monde a mettr en jiet eune art du peupl qi prenraet ao pur de la filomie bertone. Sieudant l'engaijement-la, o païsse a fere des meubls, des eripets su tétures, e de la ceramiqe. Son uzaije de la gravûre, q'o nome "imaijerie" putôt qe "etampe", montere la concevance q'ole a d'aler putôt devers le monde de par céz nous qe devers les hupës.
En 1923, Jeanne Malivel pâsse ensegnouere a l'Ecole des Biaos-Arts de Rene. Den l'ecole-la, o montre, permier, la gravûre, e son ouvrouere va étr nette conseqent pour c'qe n-i a d'interesser a la xylografie les jieunes artists a se former. O detele de son empllai traez ans pus tard raport q'ole ét p'tit vent e biao soulai. A l'etë-la, aprés q'ole alit ao pardon du Folgoad cante René-Yves Creston, Jeanne Malivel ét yeune des siens qi levent la mouvance des "Seiz Breur". Ét la jieune artist-la qi perpoze un nom pour la mouvance : les "Seiz Breur", sete freres en galo, treu son orine den le "conte des sete freres" q'araet të rasserrë en galo, en Ile-e-Vilaine, par la grand-mere a Jeanne Malivel. L'artist l'avaet fét bani dés 1922 en meniere de tirettes, den un semenier de Loudia.
Maogrë le higne-hagne qe n-i avaet tenant o le peinturou Jean-Julien Lemordant, le souéton treu tout come le tour de perzenter eune ouvraije compllet qi s'entr-tient (l'Osté). Eute-cite sera alôzée o puzieurs priz a la Montrerie enternaçionale des arts miraodits e uziniérs du temp, qi se tient à Paris en 1925.
Dés aossitôt l'entamâ de 1925, n-i a du hale-bâton den le souéton des Seiz Breur e Jeanne Malivel se n-n'ale de li, parai come son amin peinturou Pierre Abadie-Landel. O se mâri ao maez de juïllet de l'anée-la e le coupl s'anije a Vitrë. Vere meins dame, o hape la tifoïde e defunte eune anée aprés, le 2 du maez de setembr 1926 den eune clliniqe de Rene. Ole avaet 31 ans d'âje. Jeanne Malivel ét ensuérée a Loudia.
