Le nair : la « coulour » des Bertons
A l'entamâ du IXeme siecl, le rouai berton Morvan repond ao baçadou de l'empreur Louis Le Pieux : « ...vôs bouclliyérs sont bllancs, meins je pouraes mettr ao dret d'yeûs hardi q'i sont couverts o ene troubl coulour.... » E la Grand pourfecie de Bertègn (Armes Prydein Vawr), q'ét un texe galouéz du Xe siecl, conte des « naisses armées de Bertègn armoriqhaine »
N-i a pâs-meins pouint de marqe aoqhune qe les Bertons ôyûte un drapiao bllanc o ene crouéz naisse dessus durant les qerouézées. Le drapiao-la a mine d'étr vieu come la gherre de Cent ans parai come tous les siens den le méme edit (la crouéz rouje des Angllaez, la crouéz bllanche des Françaez...). Pus tard, nen le vera come drapiao de mè, enmiraodë o des pivelures d'armine.
Le serpidâ e le rouje
J'ons de cai qi nous met a sonjer qe la haote-penâ mirlitére e politiqe des Bertons de la grand-terre empllayite, ao haot më-âje, parai come les Bertons des iles, le serpidâ rouje come ene merqe de son apart. Ao d’abord, 'la q'avaet l'aparessance d'ene meniere d'engoulevent en titure o ene goule en meta ; e tout le cai-la taet menë ao bout d'ene hante. Le dessin du serpidâ rouje su un drapiao bllanc fut simpllifië diq'a n'étr pus q'ene lite rouje a l'arâz su un fond bllanc. Faot savair, aoterment d'ela, qe les armouereries és familles qi dizent q'il ont un lignaije qi s'orine des princes e rouais de Bertègn ont ben souvent des lites roujes a l'arâz de méme.
L’armine : un simbole orinë d'âillou
L'armine armoueriqe ét ene fourûre estilizée qi erperzente la coûe naisse de l'anima amarée o des fubls su son pelaije d'ivè cllere-bllanc. L'armine-la s'ét erivée den l'istouere bertone o Pierre de Dreux, qi taet signorizë Mauclerc, un prince capecien françaez qi se mariit o l'ayere du duchë de Bertègn en 1214. Le prince consort-la avaet erprinz ses armouereries de famille (un damier d'ôr e blleu de perse).
A sour fin d'étr qenûs d'o les siens de sa famille, i porte ene cotissure, ét a dire, pour li, ene cârée d'armine. Ét yun de ses jiets, Jean III (1321-1341), qi decidera d'evâiller le cartier d'armine-la a tout l'eqhu, de cai q'i s'ahuchera dede 'la armine pllain. Le chouéz-la mettra les coulours ducales parai come yelles qi taent deja les coulours bertones sembele : le nair e le bllanc. L'armine devienra admézë ene afustia de brutée de la politiqe des rouais bertons.
O l'armine-la, Jean III fèt un coup de politiqe. Le dessin des pivelures sur un fond tout de yun, 'la q'ét la merqe qi les met d'ene a reng o les rouais de France e lou eqhu de blleu de perse o des fllours de lis a rest, en méme temp qe lésser les coulours d'ôr e blleu de perse és dârains-li aprés yeûs pour ben amontrer a tertout q'il ét ao libr.
Des lejendes seront enjinées de yelle, e des croniqous conteront méme qe l'armine-la ét un simbole de la Bertègn depés les permiérs temps de l'istouere bertone. Petit a la fai, le peupl s'erqenaet den le simbole-la, e l'armine devienra gernuche-a-gernaille de cai q'ét le pus conseqent den la simboliqe bertone, parai come l'anima.
Le celtism guermille en Bertègn
Ao XIXe siecl, la Bertègn s'avize q'ole a ene orine celtiqe e, dede 'la ira s'acoster o d'aotrs payiz celtiqes. C'ét de méme qe 'la sera pour les siens de la mouvance druidiqe parème.
Trisqhel
Orinë du grec triskelês, ét a dire « a traez qhettes », le trisqhel ét un simbole universa. Raport qe nen le vaye hardi den l'art de La Tène, le monde n-n'ont fèt le métr-emblleme du celtism. E c'ét dede 'la q'i fut reprinz par les artists bertons de l'entr-deûz-gherres. Ét la mouvance artistiqe des Seizh Breur, q'avaet citrape de ranouvri l'art du petit monde berton, qi fera aqeneûtr le trisqhel-la. Sti-la ara du veghon d'ertour den le bout des anées 1960 o la rechomance de la muziqe celtiqe en Bertègn.
Ene antieve panceltiqe
'la q'ét ene raféçonerie de l'antieve naciona galouéz, Hen Wlad fy Nhadau (« Le vieu payiz de mes peres ») ecrit en 1856. La raféçonerie Bro Gozh ma Zadoù, q'ét la terlaterie du galouéz Hen Wlad fy Nhadau don, ét du fezi du barde Taldir (François Jaffrenou 1879-1956) devers 1897 qi sera li, pus tard, grand druide de Bertègn. Le chant-la sera minz « antieve naciona berton » a l'assembllée de l'Union Rejionalist Bertone de Lesneven en 1903. Du temp-la, la Consorterie Celtiqe ghette a permouver l'antieve galouéz come antieve qemun a toutes les nacions celtes. A la parfin, ét ren qe les payiz bertoniqes – Payiz de Gale, Bertègn e Cornouailles – qi n-n'ont fèt lou chant naciona.
Ene fllour come emblleme
La beriere (brug en berton), simbole de la tenouere bertone o ses berdinghettes qi haopent a la rechomance des Bertons, ét l'emblleme de la Celtie. Nen peut conter du jan etout (lann en berton) come emblleme meins sti-la n'ét pâs aotant de la qenûe come la beriere. I fute pâs-meins ben de la qenûe ao XIXe e a l'entamâ du XXe siecls, meins nen n'oui pouint aotant conter d'yeûs de ça.
Un drapiao q'ét pouint qhutë
Le « Gwenn-ha-Du » (« Bllanc e Nair ») come le monde l'ahuchent ét mézë un simbole obllijë de la filomie bertone. Sti-la ét pâs vieu-fèt pâs-meins, i fut dessinë den les anées 1920 par l'architect Morvan Marchal, o l'aïde de Ronan Klec'h (faot-nom a René Rickwaert). Les siens-la avaent ao runje de doner ene emblleme du temp a la Bertègn – den l'edit des payiz en plleine « rechomance nacionale » come l'Irlande, la Catalogne, la Finlande ou ben core le Payiz Baqse eyou qe taent concrayë des drapiaos du temp – tout en pargardant du cai d'orine come le nair e le bllanc, l'armine e la gârerie bertone. Du temp-la, nen reperchaet ao drapiao d'armine son aparessance de d'aotrfai, du temp de la segneurerie, o son dessin pâs ghere lizabl, qe le monde crayaent qe 'la taet le drapiao des chouans. Le nouviao drapiao fut minz « drapiao naciona berton » le 20 de setembr 1927, durant l'assembllée qe fut levë le Parti Aotonomist Berton -q'aguerouaet, du temp-la, toutes les boutiqes de la mouvance bertone. Permier, i n'taet qenû ren qe den le mitan politiqe e qhultura berton. A contë des anées 1960 nen le vayit bétôt a toutes les portes.
Le drapiao-la s'ét delechë de sa valantou bertonist tant qe, durant de méme, les Bertons s'erqenite deden, amontrant de méme comben q'i sont portës pour lou rejion, cant q'i sont a vayaijer âillou q'en Bertègn parème.
Un mayen d'amontrer sa filomie
Le BZH 'la q'ét l'apetiçure de Breizh, le nom berton pour la Bertègn. I fut enjinë, permier, den le mitan des anées 1960, par des poûssous bertons de Paris, des siens de la Mouvance pour Amarer la Bertègn (MOB en françaez) qi n'en fezite un colant a paisser ao qhu des chertes.
Le BZH-la fut imperminz o puzieurs decides fezandieres. Les siens qi l'avaent su lou cherte pouvaent étr enterprinz, sement. Yan meins dame, 'la q'amenit core pus fôt de lôz den sa prée. Eyou qe son lôz fut a son pus haot ét cant qe fut minz ao roule le deport internet .bzh en 2014, diz ans aprés q'enrayit le projit.
