Née-native de Paris eyou q'o chayit en 1899 den eune famille sortie du Berry, Suzanne Candré-Creston n'a pouint eune qhette de berton sement, meins 'la n'empôze tout come pouint q'o païssit deden a permouver les arts miraodifs bertons, du temp e populere. Cante son bonome René-Yves Creston q'o se mariit d'otout en 1921, o fut den la coterie qi levit la freretë artistiqe des Seiz Breur a la Saint-Michè 1923. La jieune couéfe-la mettra toute sa devocion a enjiner un eripet de drap moulë e de fayences qi sera fèt par Henriot, aféçonës pour l'enret eyou qe s'aletera la souétée bertone a la Montrerie des arts miraodifs e uziniérs du temp a Paris en 1925. Pus de 10 anées de temp durant, eute-la tienra son bout bout den la destinée des Seiz Breur, permier o des assais e des qerionées.
Meins dame la jieune artist-la enraye etout son sion a yelle, de cai qi l'a met davançouere du ranouvrissement des arts de fezis. O detele nette d'o les amochonements de miraodures qe le rejionalism du temp-la avaet pour li, o jete és brousses le "P'tit Berton" esqhultë en bragoù bras, un chapè su la téte, sans conter des armines e des trisqhels. A la contrere, ole a souin qe d'envalourer des mélayaijes de formes e de coulours q'o n-en fèt des jometries ritmées. Deden ses "sertes populéres" de fayence, o chouézit putôt des afilonjées de réles alantes en nair e blleu trémè, qheuqes fais putôt des réles blleuves e jaones (o vieût d'o 'la mettr le monde a sonjer den les coulours bertones de la mè e du jan).
Cant q'o s'assaye a enjiner des pots de qhézine, la Suzanne Candé-Creston-la aboli les rondis e 'la q'ét le lettraije qi fét le vra eripet; son asimetrie ét prinze ao pur des principaos du Bauhaus, l'ecole de bâtissanderie e d'arts de fezis alemande qi, depés 1919, enjine des formes artistiqes primes pour le temp-la. Ole ara le dezir de les fere aqeneûtr en Bertègn cant qe, entr 1923 e 1931, o conceve des projits de drâps imolës, yelle q'a oui conter etout de l'art a Sonia Delaunay. Su les drâps-la, ole assene des afilonjées d'eripets en les amochonant, les serrant e en metant de maintiunes coulours, de cai qi les forcit e les met qheuqes fais come a s'emouver.
'La q'ét core la méme qhulture de l'art de son temp qi se note den ses projits de senografie pour le teyâtr en berton q'o runjera dessur en 1927, pour le Cercl Celtiqe de Paris.
Durant eune entr-ouvraijerie des Seiz Breur q'a nom Nadozioù (les aghules), o s'assaye a fere des eripets de ferluchons brodës pour de la naperie e a des chifrs (terlaceries de permieres) pour qhi q'ole alie des solides formes plleines q'o sonje a mettr su des sarôts, des doubl-livrs ou ben core des bisas. O se chevi etout a ennouviaozi la miraodure des abis de Qhimpè, Qhimperle, Eliant e An Erge-Vras e recllame tant qe pus, a paine de ren, qe n-i araet eune paije ou ben eune gazette des modes bertones.
Aprés q'o se demarie en 1945, o met ses projits a-bâs. Raport és fètissiérs qi la-z ont hardiment dejetée (pâssë Henriot), o se n-n ale veqhi o sa seu a Ménétréol-sous-Sancerre eyou q'o n'orine pus ren avant qe de pâsser le bouéz en 1979.
