Les permieres colomnies agricoles punissementieres pour jieunes prinzoniérs sont levées den le mitan du XIXe siecl, aprés la Revoûsserie de 1848. La Revoûsserie-la fèt vrai poûr a la haote-pena menante, qi vieût aloure garder eune nâche su la goule és cllâsses populéres. Les colomnies agricoles ont, du temp-la, devocion a dercer les garcs paovrs en les cojant a aprindr les métiérs de la terre. Ao parsu du derçant qe n-i a den le projit-la, 'la q'ét de luter contr la holanderie des ruraos etout. Les jieunes sont don minz a decarègner des landiérs eyou q'en ne pouvaet ren afier, a sour fin qe du monde s'aleteraent la. La lai du 5 d'oût 1850, qi s'orine de la nouvelle -meins déja ben de la qenûe du temp-la- colomnie punissementiere de Mettray, perchain de Tours, done eune encadrure lejislative és berouétées d'ajis privées qi peupelent aloure den le payiz.
Eune aféture ben du temp-la
O la traezieme Republliqe q'ét levée a l'entamâ des anées 1870, ét le derçaije qe faot reveni dessu. L'afilonjée d'escandales de maganeries su des colons emayent le monde. E, parai, les pigots sont chaods pour déler su la seule formézon agricole qi fèt aotant come un cô su les eûs pour des garcs, qe la plleuralitë de yeûs sont des vilotins e qi n'ont souin q'a s'en retourner ben vite téter lous goute dés aossitôt debârës. Tant q'a l'Etat, il ét mézë en decide de mettr sa poqe su le dret de dercer. La consultée parlementére de 1872 consaille don de lever des colomnies punissementieres publliqes, o des formézons de métier de toutes les menieres pour les garçâilles. Ét dede 'la q'ét levée la siene de Gerveur.
Un ezempl de castéouane qi ne retire pouint den les aotrs
L'aletement morbihanaez-la ét eternë en 1880 e i n-n'a pouint d'aotrs come eute-late du temp-la. Menë par l'Etat, 'la q'ét le permier ôtë de derçaije publliqe de Bertègn. N-i ara zû afére ren qe de qheuqes dizanées pour qe stu-ci degobarderaet les aletements privës de Saint-Ilan (22) e Langoned (56), qi mettent la bâre yun aprés l'aotr, en 1888 pour le permier e 1902 pour l'aotr.
Dede 'la, la colomnie de Gerveur pâsse prinzon mitaniere de derçaije de la Grande Galerne. Etant q'ét yeune des seules prinzons françaezes den eune ile (e i n-n'a pâs hardi des prinzons de méme), l'aletement-la, raport a l'enret q'il ét, ét tout come ben pus dusse de s'ensaover de lu. O la mè q'ét tout come eune bâre naturale qe n-i a pâs mayen de pâsser come ela, les më-venus ne peuvent pouint se saover e i sont ben lein de lous anciennes côteries.
L'ilerie derçante de Gerveur ét evâillée su traez leûs e les traez-la sont a Palais. La prinzon de Haute-Boulogne, bâtie en 1848 e eyou qe n-i a zû, diq'a-la ren qe des prinzoniérs d'âje, ét le qheur de l'afétûre-la. Ét la qe n-i a les ouvrouérs, le grôs des dortouérs, les buraos de la fezanderie, la dinerie ou ben core la madelainerie. N-i a etout l'ourée mèritime eyou qe les më-venus apernent le naviaije, a fére des funes, des voueles, des eperviérs e l'ourée "uzinerie" qi aprint eune afilonjée de métiérs de main (chaossier, tâillou, menuzier, maçon, ferron e d'aotrs...)
Ét ao Château-Fouquet, pâs ben lein de Haute-Boulogne, qe n-i a, den les caves, les jéles de l'aletement. Apoûrouze e emayante, 'la q'ét putôt les colons inderçabls a y'atendr d'étr envayës den eune prinzon ben pus cojante q'en embâre deden. La ferme de Bruté, un petit pus lein den la campagne, 'la q'ét la q'ét l'ourée agricole de la colomnie. Den la ferme-la etout, n-i a de la bezogne hardi o le jerdrinaije, fére entour les bétes, coûper les arbrs e d'aotrs...
Hardi de formézons de métier d'eune sorte e de l'aotr don, e yeune de yelle, l'ourée mèritime, ét la fiertë du ministerie du Deden. A-don, l'eterne de l'aletement de Gerveur 'la q'ét l'aboutement d'un long pourcèsse pour lever eune ecole derçante de mousses en France. Aprés puzieurs projits q'ont pouint aboutës, la fezanderie punissementiere françaeze sonje q'ole a rencontrë sen afére a Gerveur pour s'ateler d'o la Grande-Bertègn e ses punissementiérs afllotants, qe le monde son jalouz su yeûs den les Assembllées punissementieres enternacionales. Dede 'la, l'aletement pâsse modele de l'eblucerie punissementiere françaeze. Les perzentézons de la formézon mèritime de Gerveur eyou q'ole ét alôzée, sont pouint la veritë vrae meins : parai come den toutes les prinzons, ét la flleulerie qe les jieunes encasteouanës ont, permier, den lous qelée.
Des enijons maganës
La fezanderie punissementiere chouézit le derçaije mirlitére pour ses enijons. Les siens-la sont revaillës ao clleron, les depllacements ao pâs mirlitére e les boujées, o des faosses armes, ça q'ét bétôt tous les jous. L'aletement ét aféçonë come un “bâtaillon ecolier” q'a devocion a mener en dret les enijons de la colomnie a la cazerne. Ét de méme qe l'Etat a ao runje de se parer a se revenjer de l'arevers de 1870 contr la Prusse, en raféçonant ses courous de bâs-chemins, cerchous de pain e petits robous en soldards ben dercës. La colomnie de Gerveur, qi retire den eune colomnie mirlitaro-punissementiere, det y'étr vûsse come eune petite cazerne.
Meins dame, l'afére-la amene de la langhirie e de la penelle tant qe pus. Permier, les enijons sont maganës, bousqhettës reglèment. Maogrë les rélées eyou q'ét imperminz toutes les menieres de maganeries, 'la q'ét les gardous, qi sont ben des fais, d'anciens mirlitéres, qi sont les pus tapous. Meins la flleulerie vient etout des colons, qe d'aoqhuns sont qheurus, côrporës e d'aotrs putôt qhervaçons etant qe n-i a des jieunes garçâilles en-méle des jieunes omes d'âje. Le pouéz psicolojiqe de la reûe o l'embârement, qe les prinzons ont 'la pour yelles, peze etout. L'elegnement, aotant jeyografiqe come familia, ét minz a jouer de toutes les menieres. En pus de la tocée psicolojiqe, les garcs-la vayent des maganeries ou ben sont maganës de maintiunes menieres. Qe les maganeries-la biteraent le côrp ou ben le mora, les merches de l'embârement sont des ressouvenances qi restent long la vie ao runje és enijons.
Un projit ben de trop ben emportant q'a fèt chat
La fezanderie punissementiere françaeze de la IIIe Republliqe dit q'ole a devocion, deden ses colomnies punissementieres, a dercer les jieunes courous de chemins e lous ofri des mayens de terouer lous pllace den la vie civile. Terjou qe la précherie oficiale-la va ben a rebou de coment q'c'ét menë den l'aféture de Gerveur. Le projit derçant-la a fèt chat come de just den l'edit d'hardi d'aotrs afétûres derçantes de méme (cazernes, bagnes, prinzons mitanieres...). En 1927, la colomnie punissementiere de Gerveur pâsse Ôtë d'Eblucerie Gardée.
'la n'empôze pouint qe les uzaijes restent manierement parai : o les 56 minous a s'ensaover le 27 d'oût 1934, le monde s'avizent qe les condicions sont pitables den qhi qe véqhissent les jieunes garcs-la. Fara esperer l'ordonance de 1945 e qe seraent levées les Afétûres Publliqes d'Ebluceries Gardées pour vaer les permiérs ebluçous a s'eriver a Palais. L'aletement de Gerveur met la bâre pour tenant en 1977.
