La Neustrie ét de méme qe s'ahuche un rouayaome franc qi s'evâillaet su toute la galerne du terrouer qi taet dessour les Francs. Durant la pâssée merovinjiene, son separt d'abâs taet la Laire e den le haot, 'la taet l'Escaut ou ben la Somme. Les payiz de Nante, de Rene e de Vane taent deden, yeûs.
La Neustrie s'orine de l'ancien rouayaome galo-romain de Syagrius, conqhétë par Clovis en 486. En 561, qe son garc Clotaire Ier pâsse le bouéz, ét le partaije du Regnum Francorum entr ses 4 fis. Chilpéric Ier a en arie un terrouer qi s'ahuchera Neustrie. Les traez aotrs grands rouayaomes sont l'Aostrazie, ao haot-soulaire, la Bourgogne ao bâs-soulaire e l'Aqhitaine a la bâsse-galerne. Le higne-hagne s'erive permier entr la Neustrie e l'Aostrazie. Puzieurs rouais, Clotaire II ou ben core Thierry III parème, regnent su la Neustrie. Meins dame den le bout du VIIe siecl, ét les Aostraiziens qi sont les métrs.
Durant la pâssée carolinjiene, la Neustrie n'ét pus un rouayaome, meins le nom ét restë, biao qe stu-ci se sera amenuzë hardiment pour n'étr pus q'un fâilli terrouer entr la Seine e la Laire. Ao VIIIe siecl, eune marche de Bertègn ét levée a la galerne de la Neustrie a sour fin de conterteni les Bertons, aprés qe Pépin le Bref a conqhétë Vane en 753. Le perfet de la marche (ou marqhiz) de Bertègn, le pus de la qenûe ét Roland. La Neustrie fut, pâs-meins, menée permier, par la famille franqe des Widonides, contes de Nante.
Long la deûzieme maitië du IXe siecl, les Bertons conqhétent un bon morcè de la Neustrie a la galerne. Les escandinaves, tant q'a yeûs, s'aleutent den le haot de la Neustrie, den le terrouer qi devienra la Normandie. Les deûz etragnances-la mettent les rouais Francs a lever deûz marches de Neustrie, yeune contr les Normands e l'aotr contr les Bertons. Le dârain menou de la marche contr les Normands, Bérenger, seraet le grand-pere a Juhel Bérenger, conte de Rene e apouyâ ao Alain Barbetorte q'il aïdera a reconqhéter la Bertègn. La marche neustriene contr les Bertons fut menée par les Robertiens, de qhi s'orinent les Capeciens, don.
