Le 24 du maez de jin 843, le jou de la Saint-Jean-Batist, des batelées de Vikings norvejiens vont olmont la Laire pour se depoucher a Nante e ragricher la vile. Les pillous-la vont la drâiller de pic-en-pac. L'eveqe ét teuë deden son egllize-mere e les nantaez teuës a mâsse ou ben core vendûs come escllaves. Ét de méme q'enraye un siecl de bâtaillerie entr les Bertons e les Escandinaves. Den le bout, la censile n'en sera a bout de cordè. Les rouais bertons les contertienent maogrë q'i se bèqent o les vikings reglement. En 853, les Vikings s'etabllissent tout come su l'ile de Biesse (l'ile de Nante d'astoure), ao dret de Nante, dede 'you q'i ne vont pouint se n-n'aler traez cart de siecl de temp durant. Il etabllissent su l'ilet-la un camp forci o un marchië pardurabl eyou q'i vendent tout le cai q'il ont robë durant lous pillaijes. Den les anées 880, les escandinaves-la sont a ben de la gherre civile qi met les bertons a s'entr-batr. Il ont minz la poqe su un bon morcè du terrouer berton sement, meins dame le rouai Alain Le Grand va bétôt les deqhuler dede 'la.
La Haote-Pena a se holander
En 913, Gourmaëlon, q'ét l'ensieuvant d'Alain, pâsse le bouéz. De la secousse, la Bertègn n'a pus de rouai. Dede 'la, ole ét un terrouer bon a empouiller pour les pillous escandinaves-la, un terrouer natura eyou peupeler pour yeûs-aotrs, raport qe tout le restant de l'Urope de la galerne ét ou ben deja ao bada des vikings ou ben garanti par des princes puissants. En 911, o le parchat de convenance de Saint-Clair-sur-Epte, le rouai franc Charles III avaet recedë Rouen e la coulée de la Seine a l’entour ao menou escandinave Rollon. Du terrouer-la s'orinera la Normandie qi sera levée par aprés.
Meins dame, en 913 les Vikings tombent su le pai des mouenes de Landévennec e pillent l'aboui. Du temp-la, ole ét tout come la pus consecante des fondézons moueniales de Bertègn de la galerne. Le pouair espiritua berton en sera de pire. Dede 'la, les abriveries ne se doneront pouint le tour e haicheront la Bertègn sans qe n-i araet la pus fâilli rezistance a se revoûsser. En 919, Rögnvaldr (Ragenold) met eune dâraine tossée a l'ancien rouayaome o un maçacr d'arsaot su la censile e en s'aleutant a Nante, dede 'you q’il aghette, menant tout la Bertègn.
Depés 913, le monde d'egllize e de la haote-mestranje avaent qemencë a s'ensaover a mâsse de la Bertègn pour se n-n'aler en Francie ou ben core en Anglleterre. La hardi-pernance de Rögnvaldr va mettr core pus fôt de monde a chaner, la plleuralitë de la haote-pena qi taet core la se n-n'alera, yelle, en 919-920. Le monde-la emmene reliqes e livrs-fètis d'o yeûs, q'ao jou d'anet i n-n'a pus yun des texes ecrits den les scriptoria moueniales bertons sitant fezantes avant qe les vikings vienent lever du néz par céz nous.
En qheuqes enrets, permier su Nante, sembele qe n-i a zû a rest de vikings a s'etablli. La « Chronique de Nantes » ecrite ao siecl d'aprés, conte méme qe « les paovrs bertons afiant la terre restite tertout sous la dominance des barbares, sans ghide e sans aïde ». Le conte de Rene, Juhel Bérenger, tiembondra tout come long la pâssée-la o eune politiqe fin finaode de un coup le vaici, un coup le vla entr les Francs e les Normands.
Des princetës escandinaves en Bertègn
Aprés qe d'avair acernayë Nante a paine de ren cinc maez de temp durant, Robert, le marqhiz de Neustrie, qi taet pour aler rouai de France l'anée d'aprés, recede la Bertègn a Rögnvaldr. La Bertègn-la « q'il avaent [les vikings] draillée o le payiz de Nante » d'aprés le croniqou Flodoard. De la secousse, a conter de 921, en Bertègn n-i a eune princetë escandinave erqenûe par les Francs.
Pâssë Nante, nen set ben qe n-i a zû puzieurs p'tites princetës escandinaves en Bertègn, yeune en Cornouaille parème ou ben core yeune den le Pintievr. A lére Jean-Christophe Cassard n-i a ventiés zû hardi de camps vikings su les bords de mè du haot de la Bertègn : Saint-Mâlo, eyou qe le fondement de la tour Solidor (Saint-Servan) montere ben q'i fute etabllis ilë, Saint-Sulia, Trent (camp du vieux M'na) e, permier, le camp de Peran a Plledran.
Dans les anées 920, les Vikings partent don a colomnizer la Bertègn.Toutefai, a la contrere des vikings de la Seine qi tournent franc de pic en pac e qemencent a mener lou terrouer pour c'qe n-i a de l'economie e de la fezanderie, les siens de la Laire, yeûs, tienent eune perzence q'ét, pour ben dire, ren qe mirlitere. I se servent du payiz sans pâs assayer de l'amarer.
En pllace qe de se pâsser o le parchat de convenance de 921, Rögnvaldr ét core a ataqer les Francs-la, Nante aqhitant d'avivande d'erre pour li. Sti-la ataqe l'Aqhitaine e l'Aovergne en 923 pés va olmont la Laire en 924 e pille la Bourgogne. En 927, a Nante, le Rögnvaldr ét acernayë par les Francs, meins du coup-la les siens-la restent su le sabl. Nante ét bâillée és Vikings a bon - meins l'ét pouint contance du restant de la Bertègn la fai-li -. En pour, les Vikings vont mettr a bâs lous abriveries. 'la n'empôze pouint les escandinaves d'envayer le parchat de convenance és bloces e d'ataqer l'Aqhitaine e le Limouzin un p'tit pus tard en 930. La fai-la, meins, i vont avair eune fameûze drâillée su la Dordogne o le rouai Franc Raoul.
En 931, eune permiere revoûsserie bertone menée par le jieune Alain Barbetorte e le conte de Rene Bérenger, prouve ben qe les pies ne chantent pus come les cônies pour les Vikings. En Cornouaille, le Bertons menent eune vra turie de jens céz les empouillous escandinaves, permier en teuant lou menou, le duc Félécan. Eune fai les cônes sorties du fein, les Vikings de Nante, menës par Incon, l'ensieuvant de Rögnvaldr, menent eune grande berouée de revenjance su la Bertègn, o le Duc des Normands de la Seine Guillaume Longue-Epë a lou doner la main e... l'epë. De la secousse, Alain Barbetorte ét cojë de se holander d'ertour. I s'en retourne pâs-meins en 936 pour reconqhéter son rouayaome contr des Vikings atijës o lou afilonjée d'arevers su la Laire e depouchës la par les aotrs escandinaves. Fara pâs-meins aler diq'en 939 pour se chevi des dârains Vikings.
Eune coûpure a nif
Qhelle chandelle elumer o les pus de 20 anées de temps eyou qe les Vikings fute les métrs en Bertègn ? De greûs, n-i a pâs ren den la meniere q'ét afétée la Bertègn aprés 939 pour c'qe n-i a de l'economie e de la societë qi s'orine des Vikings. 'La n'ét pouint qe la pâssée 913-936 fut ren q'eune maloure qi ne porteraet pouint en sorte raport qe biao q'il ont pouint afétë la Bertègn, les Vikings ûte tout come le temp de s'aleuter. N-i a core qheuqes noms de leûs orinës d'escandinave en Bertègn, permier és ebords de mè. La tombe-barqe viking terouée a Groix en 1906 ét ben la prouve qe les Escandinaves avaent crochës en Bertègn en se vayant come su yeûs. Pour c'qe n-i a de la jenetiqe, o les qheuqes roches qe n-i a, ben râles terjou, Jean-Christophe Cassard ét de mode de dire qe n-i araet ventiés zû pus fôt de Vikings a fére des garçâilles en Bertègn q'en Normandie.
Meins dame, de haot ou de bâs, la pâssée viking fut eune coûpure a nif den l'istouere de la Bertègn. Les qhemunaotës erlijiouzes s'en revienront ben vitement céz nous meins i s'en revienront sans lous afutiaos e lous reliqes. La memouere de la Bertègn ét devenue a ren. Pour ben dire, l'istouere des permiérs siecls de la Bertègn ne peut pus s'ecri ren q'en s'orinant su les ecrivaijes des croniqous galo-romains e francs, ét a dire les nemis des Bertons, de Grégoire de Tours a Ermold le Noir. Qhuinée, detolie de ses richesses qhulturales e de son patrimouene espiritua, la Bertègn deheûdée ét bourdée, o n'ét pus alante come taet le rouayaome de Nominoë e des siens aprés li.
