Morlaez, Saint-Mâlo ou ben core Nante, les viles-ports-la devent ben de cai a la mè. És XVe e XVIe siecls, nen i vayaet du monde de toutes orines e nen i ouayaet bel e ben de parlements. La Bertègn, o ses afilonjées de rias, aberiâs, bées e golfes taet toute evâillée su le monde e se marchandaet d'o lu, permier par les mès su qhi hardi de monde voulaent mettr la poqe e eyou qe les nâcions taent tenant a s'entr-battr.
Mâri raport és conqhétes des Espaignols, François Ier arjentit pour la permiere fai eune menée d'esplorézon. Michel Le Bris sonje li qe « l'encorporézon de la Bertègn den le rouayaome de France, qi fut parfinie en 1532, cant q'c'ét qe François 1er la'z ôyû en arie pour son fi le Daofin, ratizit sour le terpië de la France. En pus des ebords de mè escarabls, ét etout eune qhulture de mè vra riche e vra ancienne su qi la Courone minz la poqe ». Raport qe le rouai avaet citrape de decouvri le monde, la merigaoderie, un metier vieu come mirote, sera minze den les louais de pus en pus.
Merigaodiérs e coursouérs
Le mot françaez « pirate » s'orine du grec ancien peiratês e ét ben la prouve d'eune fezance q'ét vaille come les chemins. Le mot de « corsaire » ét li hardiment pus nouviao. I s'orine du latin cursus qi vieût dire « cours » e fut forjë ao XVe siecl. Les deûz mots-la sont pâs-meins qheuqes fais empllayës yun pour l'aotr biao qe « pirates » e « corsaires » n'avaent pouint le méme estatut du temp-la. Les permiérs taent des siens den le non-dret e, dede 'la, i taent ao biao d'ariver a la cârée ao câs q'il araent të prinz. Terjou ét-ti, les veûs-la ne sieudaent ren qe lou réles a yeûs, q'il abutaent en assembllée su le batè.
Pour c'qe n-i a des coursouérs, i taent yeûs des marins qemissionës q'avaent eune « lettr de courserie » baillée par lou rouai (ou ben par sa fezanderie parai). 'la taet eune meniere, pour les rouais-la, de mener des gherres sans pâs fribaler de trop. Les coursouérs saotaent putôt su les batiaos marchandous qe su les mirlitéres, de méme l'economie du payiz nemi en taet de pire. Les coursouérs-la menaent lou drao a lou bada, meins il avaent tout come de sieudr les réles de la gherre. Il avaent de porter du respet pour les vies e pour le fèt és siens a qhi q'i prenaent afére. N-i avaet ren qe la prinze qi les menaet en constibi. Pour c'qe n-i a des véssiaos il taent portës aotant pour les sloops come pour les cotrs, des p'tits batiaos de 26m de long, qi taent neuzës a coure su l'iao e qi n'avaet pouint afére d'eune greûsse batelée pour étr menës.
Le depllet du coursouer de Morlaez Nicolas Anthon (1714~1753) conte de qheule maniere qe taent rençonës les batiaos : « nen lou baillaet aloure eune recepée, qe le captaine rençonë avaet qe de perzenter si q'un nouviao coursouer li metaet la poqe dessu. A-don, 'la taet imperminz de rençoner deûz fais le méme batè. Si qe la prinze taet brave e permetaet eune bone vendicion, o taet ramenée ao port de Morlaez eyou qe le tribuna des prinzes avaet, permier, d'afeurer si qe le batè-la taet « de bone prinze ». E dede 'la qe nen pouaet vendr tout le cai a la poussée, ou ben don, falaet l'erdoner a ses métrs. Les elijes taent yelles aloties entr l'Etat, les armatouérs e l'eqhipaije. Les veuvieres e les siens emaonës avaent yeûs-aotrs eune ourée o du rencherdi ».
Des merigaodiérs...
Des merigaodiérs, i n-n'a pâs ghére qe l'Istouere a qheuqes remembrances de yeûs. Ventiés a caoze q'i dansaent la malézée ao bout d'eune rôte avant qe d'avair fèt la pus fâillie haote-menée. Si qe le code de Bertholomew Roberts ne v'laet pouint oui conter des couéfes, i n-n'avaet pâs-meins su les batiaos e, en Bertègn, i fut hardiment contance de deûz merigaodieres : permier la Jeanne de Belleville (~1300-1359), pés la Anne Dieu-le-veut (1661-1710) née-native de Gourin qi, cante les traez bonomes q'ole a zû (Pierre Lelong, Joseph Chérel pés Laurent de Graff) menit le drao su puzieurs mès de la pllanete. Jean Coatanlem (1455-1492), signou de Kéraudy en Plouezoc’h, q'abouti amira du Portugal o le titr de « Gouvernouer de la mè », fut li etout un grand merigaodier berton. I fut daonë par le duc de Bertègn aprés q'il ôyû sépillë Bristol.
…és coursouérs
Meins dame, qheule menée qe la vie de merigaodier ou ben de coursouer ! En pllace qe de ressieudr de méme, le monde-la avaent putôt citrape d'avair bon lôz assë pour amonter les rolons de l'echielle socia. Gilles Lapouge contit l'istouere d'un merigaodier qi metit ben d'apert qe les devarinades ne taent ren q'un debllâme : « En 1728, un nantaez q'avaet nom Jeann Thomas Dulaien mettit la poqe, sans flleûlerie aoqhune, su qhinze batiaos tant qe li ne menaet ren q'un coupl de fâillis roqiots. De ça, i se n-n'alit devers la Tortue qe le teinzou seraet partaijë, e i n-n'avaet !, de méme qe de fére ramarer yun des deûz batiaos. Su l'ile-la, meins, durant qe les marins taent entour de la coqe, Jean Thomas grayit l'aotr batè eyou qe taet le teinzou e huchit de méme a ses marins « A qheuqes jous, gripaods, je ses parti a me n-n'aler en France e je n'ses mai pus merigaodier ! ».
La cârée ou ben la glouere, qhession d'estatut, qhession d'erqenessance.
