Drailh prefeti Naoned : ur vrizhtouristelezh ?

Aozer : Johan Vincent / Mezheven 2020

Pa skrive ar gazetennerien pennadoù diwar gweladennerien dimantroù miz mae 68 ne veze kaoz gante nemet eus Pariz ha, spisoc’h c’hoazh eus ar c’harter latin e lec’h e oa bet savet ar pep brasañ eus ar sparloù-straedoù. Arvest meur miz mae 68 an hini a voe, beuzet gwagennoù ar radioioù hag an tele ha duet pajennoù ar c’hazetennoù gantañ. Hag ar Barizianed, ha tud ar banlev d’o heul, da zont da birc’hirinañ war al lec’hioù a oa bet kaoz diwar o fenn e kement media a oa. Hag ur c’hazetenner, d’an 13 a viz mae e Paris Jour, o werzaouiñ diwar « familhoù a-bezh deuet war o fouezig da vale a-hed hag a-led e karter ar sparl-straedoù, o sellet etre bam ha heug ouzh ar ruioù bet dibavezet, bruzunoù gwer stlabezet ha frammoù gweturioù suilhet a lec’h da lec’h warne. Ha kazetennerien France-Soir da luc’hskeudeniñ ar pennoù-klapez, o mikinik-foto tro d’o c’hoûg, o foltrediñ kement ha ma c’hallent al lec’hioù ma oa bet kann etre an archerien hag ar studierien e-pad an noz kent.

Foar ar glapezien-se ne voe ket diouti e Breizh. Ne oa ket bet savet e Breizh sparloù-straedoù bras ha ne gavas ket ar bernioù patatez ha kaol fleur, bet disac’het gant ar venajerien war hentoù departamant aodoù-an-Hanternoz dreistoll, kalz a c’hras digant danvez arzourien o luc’hskeudennerez. E lec’hioù zo e teuas tud da guriusat en-dro d’an distrujoù memestra, evel ar frioù-furch a weler ur strobad anezhe e-tal savadurioù drailhet prefeti Naoned, war al luc’hskedennoù bet staget gant an is-brigadier Konnan ouzh e rentañ-kont d’an 29 a viz mae diwar an distrujoù-se. E Naoned avat ne c’hellas ket ar c’hlapezien tostaat d’al lec’hioù ma oa bet reuz enne, er c’hontrefed eus touristed sparloù-straedoù Pariz.  Ne voe ket eus Dark tourism eta, da lâret eo eus an douristelezh zu a weler bremañ o tiwanañ en-dro d’al lec’hioù c’hwezh ar marv, ar brezel hag an dismantroù bras warne.

MENEGIÑ AR PENNAD

Aozer : Johan Vincent, « Drailh prefeti Naoned : ur vrizhtouristelezh ? », Bécédia [en ligne], ISSN 2968-2576, mis en ligne le 22/06/2020.

Permalien: http://bcd.bzh/becedia/br/drailh-prefeti-naoned-ur-vrizhtouristelezh

Kinniget gant : Bretagne Culture Diversité