E-doug an 20vet kantved eo aet al labourerezh-douar war ziskar en inizi ha setu m'o deus komprenet abred-tre a-wechoù ar strollegezhioù lec'hel pegen pouezus e oa evit an diorren lec'hel, ouzhpenn da broduiñ boued, a zo e bal pennañ. Harpañ al labour-douar en inizi a dalvez stourm ouzh an dremm-vro da vezañ goloet gant fraostoù, a-raok tout. Talvezout a ra ivez delc'her postoù-labour ha klask harzañ diskar ar boblañs. Er bloavezhioù 1950, en Enez-Groe, e harp ar gumun pemp labourer-douar eder o tont eus an douar bras d'en em staliañ, pa ne oa eneziad ebet prest d'hen ober. E 1973, en Houad, e vez krouet ur gevelouri evit sevel deñved, ha padout a ra c'hwec'h vloaz. En Enez-Eusa, e-kreiz ar bloavezhioù 1970, gant harp Park natur rannvroel Arvorig, e klasker e-pad meur a zek vloaz lakaat labour-douar ar vro, bevidik hag a-vicher, da vevañ en-dro. Deuet e oa seurt mennadoù a-raok o amzer ha diaes e oa bet dezho padout rak ne oa ket bras entan an enezidi ha ne glotent ket gant marc'hadoù labour-douar skoueriekaet a lakae ar prizioù da zigreskiñ dizehan.
Etre ar bloavezhioù 1990 ha 2000 eo deuet al labourerezh-douar da gaout souten an holl evit abegoù ouzhpenn : liesaat an ekonomiezh lec'hel hag ar c'hinnig touristel, kinnig produioù eus ar vro dre rouedadoù berr, gwareziñ ar vev-liesseurted, a zo dibar alies ha na vez kavet nemet er metoù digor, stourm ouzh ar riskloù a danioù-gwall, lakaat labourerien oberiat da zont d'an enezenn da chom a-hep ar bloaz gant o familh (ur redi eo a-wechoù evit ma chomfe digor ar skol), skoulmañ liammoù sokial, hag all. Nevesoc'h 'zo c'hoazh eo deuet goulenn dalc'husted ar boued en inizi hag o sujidigezh ouzh ar pourveziñ o tont eus an douar bras da vezañ tabutet. Strollegezhioù 'zo o deus savet programmoù oberoù evit diorren ul labour-douar padus ha, nevesoc'h 'zo, Raktresoù evit ar boued en tiriad (Projets alimentaires territoriaux), evit diorren al labourerezh-douar ha tennañ gounit eus e berzhioù mat. Enez-Vriad, ar Gerveur, Enez-Euz, Enez-Ré hag Oléron o deus graet, da skouer. Er programmoù ha raktresoù a-seurt-se e vez renablet oberoù a bep seurt, adalek ar produer betek ar bevezer. Lod eus ar strollegezhioù, ouzhpenn da se, a zo perc'henn war savadurioù labour-douar (Enez-Ré, An Arzh, Enez-Eusa, Enez-Euz, Enez Aix), pa vefe penn-da-benn pe war ul lodenn anezho nemetken. Gant se eo aesoc'h en em staliañ ha sur eo e chomo gouestlet ar savadurioù d'al labour-douar, ha pa vo aet al labourerien-douar war o leve.
Ret eo menegiñ ar c'hevredigezhioù, pa vodfent tud a-vicher, keodedourien pe an daou asambles. Alies e vezont rakwardour ha kenoberourien a-bouez evit ar strollegezhioù er raktresoù-se evit souten hag adlañsañ al labourerezh-douar en inizi.
