Bezañ mestr war ar mor ha war an arvor zo unan eus palioù politikel Fulup IV Bro-C’hall er brezelioù a ren. Dre ma vez gantañ brezel war-lerc’h brezel, a-enep Bro-Saoz da gentañ, a-enep Flandrez da c’houde, e teu da gompren ez eo ret kaout ur vorlu evit brezeliñ. Unan eus e zivizoù a vo lakaat sevel Kloz ar Galeoù e Rouen, a vo anezhañ arsanailh kentañ ar roue adalek 1292.
Ur perzh a-bezh a rank Breizh c’hoari en erbedoù-se eta, diwar neuze. Goulenn a ra ar roue Capet ouzh beskont Avranches ren un enklask eno e 1296, a-hed aodoù Mor Breizh dreist-holl. Bloaz a-raok, e 1295, ha brezel dezhi c’hoazh etre Bro-C’hall ha Bro-Saoz, ez eus bet kaset ur skrid-memor da Fulup IV evit e ditouriñ diwar-benn ar mod da armiñ ur vorlu ha da gaout ur marin a vrezel a c’hellfe diskenn e Bro-Saoz. Pa ’z eus meneget er skrid-se batimantoù e porzhioù Rouen, ar Roc’hell, La Réole ha Bourdel, n’eus meneget hini ebet e Breizh avat. Unan eus palioù an enklask-se gant beskont Avranches a oa marteze taoler ur brassell ouzh ar pezh a oa posubl da ober er porzhioù pennañ, penn-da-benn da aodoù an hanternoz e Breizh.
Hiviziken e tro roue Bro-C’hall war-eeun etrezek roue Bro-Saoz en aviz da zifenn madoù ar Vretoned. D’ar 6 a viz Mae 1310 e c’houlenn gant Edouard II ma vefe digollet tud Sant-Maloù war-lerc’h ar gaou bet graet dezho gant tud Baiona, a oa sujidi da roue Bro-Saoz da neuze. E 1313 e kas da roue Bro-Saoz ar c’hlemmoù en deus bet digant menec’h hag enezidi ar Gerveur, bet peilhet o madoù dezho gant morlaeron saoz. Bezañ mestr war ar mor ha war an arvor, aze emañ an dalc’h diwar neuze etre roue Bro-C’hall ha dug Breizh.
